Дундад улс хүнсний аюулгүй байдлын хуулийг албан ёсоор хэрэгжүүлж эхлэв

Дундадын шинээр засвар оруулсан хүнсний аюулгүй байдлын хуулийг 10 дугаар сараас албан ёсоор хэрэгжүүлж эхлэв. Аж ахуйн нэгжийн хууль бусаар өртгийг ихээр нэмэгдүүлэх, хариуцлагаа урвуулан хэрэглэсэн албан тушаалтныг огцруулах, хүнсний бүтээгдэхүүнийг тодорхойлох дүрэм тогтоох зэрэг олон төрлийг хамарсан хүнсний аюулгүй байдлын шинэ хуулийг түүхэнд хамгийн хатуу хууль гэж нэрлэж болох юм. Тэгвэл түүхэнд хамгийн хатуу хууль гэгч энэ хуулийн хатуу нь хаанаа байна вэ? Бээжингийн Шинь Фа Ди хөдөө аж ахуйн бүтээгдэхүүний бөөний захын ажилтан хэлэхдээ:

– Илүү аюулгүй хүнсний ногоогоор хангахын тулд бид борлуулах бүтээгдэхүүн бүрт хоёр хэмжээст код нааж, гар утсаар уншуулах замаар бүтээгдэхүүний үйлдвэрлэсэн газар, бүтээгдэхүүний төрөл зүйл, чанар чансаа, стандартыг олж мэднэ. Энэ нь бүтээгдэхүүнд \”иргэний үнэмлэх\” олгосонтой адил юм гэжээ.

Бээжингийн Шинь Фа Ди хөдөө аж ахуйн бүтээгдэхүүний бөөний захын хүнсний ногоо нийлүүлэгч Зай гуай хэлэхдээ: – Хүнсний бүтээгдэхүүнийг тодорхойлох системийг уншмагц хүнсний ногооны бүх мэдээллийг тодорхой мэдэж болох юм гэжээ.

Шинээр засвар оруулсан хүнсний бүтээгдэхүүний аюулгүй байдлын хууль нь хүнсний бүтээгдэхүүний үйлдвэрлэл эрхэлдэг аж ахуйн нэгжид хүнсний бүтээгдэхүүнийг тодорхойлох систем тогтоож, хуулийг дагаж мөрдөх баталгаа өгсөн юм. Энэ оны 10 дугаар сарын 1-ээс энэхүү хуулийг албан ёсоор улс даяар хэрэгжүүлж эхэллээ.

Дундадын Хөдөө Аж Ахуйн Их Сургуулийн Хүнсний шинжлэх ухаан, Шим Тэжээлийн Инженерийн Дээд Сургуулийн захирал Лүө Юньбө: – Энэ тогтолцоо хүнсний аюулгүй байдлыг эх үүсвэрээр нь баталгаажуулах, учир дутагдалтай бүтээгдэхүүнийг буцаан хурааж авахад ашигтай юм гэжээ. Тэрээр:

\”Хүнсний бүх дамжлагын аюулгүй байдлын баталгааны энэхүү тогтолцоо хүнсний аюулгүй байдалд үйлдвэрлэгч, эрхлэгч гол хариуцлага хүлээх ёстойг тодруулсан юм. Хүнсний аль дамжлагад асуудал гарсныг шууд тодорхой тогтоож, хариуцлага хүлээлгэж, аюул ослыг тогтоон барьж чадна. Хүнсний аж үйлдвэр эрхлэлтийн нэгжүүдийн мэдээлэлжүүлэлтийн арга барилыг хүнсний дамжлагын тогтолцоонд ашиглан, ажлын үр ашиг, түвшинг дээшлүүлэхийг хуулиар баталгаажуулж байна\” гэлээ.

Хүнсний аюулгүйн шинэ хуульд \”хуулийн хариуцлага хүлээлгэх хатуу дүрэм\” тогтоож, хууль зөрчихийг хориглох түвшинг дээшлүүлсэн төдийгүй хүнсний аюулгүй байдлын салбарт гэмт хэрэг үйлдсэн тохиолдолд ял оноох, тус салбарт дахин аж ахуй эрхлэх эрхийг хасах стандарт зэргийг тогтоохоор байна.

Дундадын үндэсний хүнс, эм бэлдмэлийн хяналт удирдлагын ерөнхий газрын дарга Жан Юн:

\”Хүнсэнд хор хөнөөлтэй бодис хольсон зэрэг хууль зөрчсөн үйлдэл гаргасан бол лицензийн эрхийг нь шууд хасах бөгөөд тус бүтээгдэхүүний хамгийн дээд үнийг 30 дахин нэмэгдүүлсэн өндөр торгууль тавина. Хүнсэнд аюулгүйн асуудлаар шийтгүүлсэн юм уу, хуурамч тайлан гаргаж ажлаасаа халагдсан хүнсний хяналт шалгалтын ажилтныг тус салбарт насаар нь дахиж ажиллуулахгүй\” гэжээ.

Хүнсний аюулгүй байдлын шинэ хуульд хүнсний аюулгүй байдлын зөрчлийг мэдүүлэхийг удаасан, дарсан, худал мэдээлсэн юм уу тухайн салбарт дахин давтан зөрчил гаргаж, ноцтой үр дагавар гаргасан бол гол удирдлагыг нь огцруулна гэж заасан байна.

Дундадын Ардын Их Сургуулийн Хууль зүйн факультетын профессор Ван Шүй \”гурван хатуу\” гэх үгээр Хүнсний аюулгүй байдлын шинэ хуулийг дүгнэн хэлж байлаа.

Нэгдүгээр хатуу нь хариуцлага хүлээх гол цогц өргөн төлөөлөлтэй болсон байна. Үйлдвэрлэгчээс эхлэн засгийн газрын холбогдох салбар, тэрчлэн нийгмийн байгуулал бүрийг шийтгэх тогтолцоонд хамруулжээ. Хоёрдугаар хатуу нь хариуцлага нэхэмжлэх эрч хүчийг нэмж, олонх торгуул нэхэмжлэлийн хэмжээг илэрхий нэмэгдүүлсэн байна. Үйлдвэрлэгчид хатуу шийтгэл оногдуулах юм байна. Гуравдугаар хатуу нь нэхэмжлэх арга хэмжээний талаар олон ургальч болгожээ. Эд хөрөнгийн торгуул оногдуулах төдийгүй хүний биед шийтгэл оногдуулж, эрхийг нь хасах зэрэг олон арга хэрэглэжээ. Гэмт хэрэг гэж нотлогдвол хүнсний бүтээгдэхүүн үйлдвэрлэх салбарт насан туршдаа ажиллаж болохгүй гэх мэт шийтгэл оногдуулдаг боллоо гэжээ.

Сайн хуулийг сайтар хэрэгжүүлэх хэрэгтэй. Түүхэнд хамгийн хатуу гэсэн хүнсний бүтээгдэхүүний аюулгүй байдлын энэ хуулийг хэрэгжүүлэх талаар ард иргэд ихээхэн хүсэл найдвар тавьж байна.

Хуулийг сайтар хэрэгжүүлэхийг хүсэж байна. Хяналт нь чанга байхыг хүсэж байна. Дундадын хүнсний бүтээгдэхүүн улам журамжиж, хөхүүлэн шагнах болон шийтгэл торгуул нь тодорхой байж, хүмүүс сэтгэл амар худалдан авч хэрэглэхийг хүсэж байна гэжээ.

Эх сурвалж: http://www.solongonews.mn/