Алим нь олдоц хүртээмж элбэг, үнэ хямд, амттай, хүн төрөлхтний хувьд хамгийн түгээмэл хэрэглэдэг жимс билээ.
Дэлхий дахинд “Өдөрт 1ш алим идвэл эмч дээр очих шаардлагагүй” гэсэн ам дамжсан хэллэг хүртэл тархсан байдаг.
Тэгвэл өдөрт 1ш алим идсэнээр үнэхээр эмчид очих шаардлага гарахгүй юу?
Алимны хэрэглээг эмчийн үзлэгтэй холбосон судалгаанаас өдөр бүр алим идэх нь эмчид очих тоог бууруулдаггүй гэсэн үр дүн гарчээ. Гэхдээ өдөр бүр алим иддэг хүмүүс, өдөр бүр алим иддэггүй хүмүүстэй харьцуулахад ЭМИЙН ЭМЧИЛГЭЭ хийлгэх нь бага байгааг мөн судалгаанаас тогтоосон байна.
Тэгвэл өдөрт 1ш алим идсэнээр эмчид очих тоог бууруулахгүй ч эмийн хэрэглээг багасгадаг байна.
Ингээд алимны ашиг тусын талаар товч мэдээлэл хүргэе.
Амин дэмээр баялаг
Алим нь С амин дэмээр баялаг бөгөөд үрэвсэл, исэлдэлтийн эсрэг амин төст нэгдлүүд болох quercetin, caffeic acid, epicatechin зэрэг флавнойдуудыг агуулсан байдаг. Мөн кали, зэс, К амин дэмийг агуулдаг.
Зүрх судасны өвчнөөс сэргийлнэ
Нийт 20 мянган насанд хүрэгчдийн дунд хийгдсэн судалгаанаас алим зэрэг дотор талдаа цагаан өнгийн жимс, ногоог хангалттай хэрэглэх нь зүрх судасны өвчлөлөөс тэр дундаа цус харвалтаас сэргийлдэг болохыг тогтоожээ.
Мөн алим нь уусдаг эслэгийн гол эх үүсвэр бөгөөд эслэг нь холестрены түвшин, цусны даралтыг бууруулахад нөлөөлсөнөөр зүрх судасны өвчлөлөөс сэргийлдэг.
Хорт хавдрын эрсдлийг бууруулна
Алим нь хорт хавдрын эрсдлийг хамгийн ихээр бууруулдаг исэлдэлтийн эсрэг (антиоксидант) болон фловнойдууд (амин төст нэгдлүүд) -ийг агуулсан байдаг.
Уушиг, бүдүүн гэдэс, амны хөндий болон улаан хоолойн хорт хавдрын эрсдлийг бууруулахад алимны хэрэглээ чухал болох нь хэд хэдэн судалгаагаар батлагджээ.
Жин хасахад тустай
Алимны хальсанд уусдаг эслэг агуулагдах бөгөөд эслэг нь өтгөн хаталтаас сэргийлдэг. Мөн эслэг нь цадсан мэдрэмжийг удаан хугацаанд өгдөг бөгөөд үүгээрээ илчлэгийн илүүдэл хэрэглээг бууруулж жин хасахад тустай байдаг.
Чихрийн шижингийн эрсдлийг бууруулна
Өдөрт 1ш алим иддэг хүмүүс алим бага иддэг хүмүүстэй харьцуулахад 2-р хэлбэрийн чихрийн шижингээр өвчлөх нь 28%-иар бага байдгийг тогтоосон байдаг.
Хөгшрөлтийг удаашруулна
Амьтан дээр хийсэн судалгаагаар алим өдөр бүр идэх нь исэлдэлтийн стрессийг бууруулж, сэтгэл санааны өөдрөг байдалд нөлөөлж, хөгшрөлтийн үйл явцыг удаашруулж байгаа үр дүн гарсан байдаг.
Анхаарах нь: Өдөрт 1ш алим идэх нь эрүүл мэндийн өндөр ач холбогдолтой ч нэг өдөр олон алим идэх нь сайн гэсэн үг биш юм. Алим нь фруктоз хэлбэрийн нүүрс-ус бөгөөд нэг дор идэх хэмжээгээ анхаарах нь зүйтэй.
Мөн ходоод гэдэсний шарх, үрэвсэлтэй бол эслэг хүнсийг хязгаарладаг болохыг анхаараарай. Бусад төрлийн жимс, ногоонуудад ч алимын адилаар олон амин дэм, эрдэс бодис агуулагдах бөгөөд бид өдөр тутамдаа олон нэр төрлийн жимс, ногоо идэж тэнцвэртэй хооллох нь эрүүл мэндийн хувьд ач холбогдолтой юм.
