ОХУ-ын Ерөнхийлөгч Владимир Путин Украин улстай хийсэн “Хар тэнгисийн үр тарианы гэрээ” ямар ч утга учиргүй болсон тул гэрээг цаашид сунгаагүй хэмээн мэдэгджээ. Тэрбээр “Бидний зүгээс тавьсан гэрээ сунгах шаардлагыг үл тоосон тул утгаа алдсан” хэмээсэн байна.
Өнгөрсөн жил НҮБ болон Туркийн дэмжлэгтэйгээр ОХУ, Украин улсууд “Хар тэнгисийн үр тарианы гэрээ”-г байгуулсан. Харин Керчийн гүүрний дэлбэрэлтийн дараа ОХУ тус гэрээг сунгахгүй гэдгээ мэдэгдсэн юм.
Улмаар Украины Ерөнхийлөгч Володимир Зеленський “Оросын оролцоогүйгээр үр тарианы экспортыг үргэлжлүүлнэ” гэдгээ илэрхийлсэн.
Харин ОХУ-аас Украины Хар тэнгис дэх хэд хэдэн боомт руу дайрав. Үүнийг Керчийн гүүрний дэлбэрэлтэд хариу барьж буй үйлдэл хэмээн тайлбарласан. Дайралтын улмаас өчигдөр нэг иргэн амиа алджээ.
“Хар тэнгисийн үр тарианы гэрээ”-г цуцалсны дараа Ерөнхийлөгч Путин Оросоос шаардаж буй таван шаардлагыг биелүүлбэл үр тарианы гэрээнд эргэн нэгдэнэ гэдгээ Барууныханд илэрхийлсэн юм. Тэдгээр шаардлага нь:
- ОХУ-ын Хөдөө аж ахуйн банк, “Россельхозбанк”-ыг SWIFT төлбөрийн системд эргэн нэвтрүүлэх;
- Орос улсад хөдөө аж ахуйн техник, сэлбэг хэрэгслийн экспортыг сэргээх;
- Боомтууд руу зорчих Оросын хөлөг онгоц, ачааны тээврүүдийн даатгал, нэвтрэх эрхэд тавьсан хязгаарлалтыг цуцлах;
- Оросын Тольятти хотоос Украины Одесса хүрэх, эвдэрсэн аммиакийн экспортын хоолойг сэргээх;
- Оросын бордооны компаниудын санхүүгийн үйл ажиллагааг эргэн нээх юм.
Эх сурвалж: Ройтерс
