Нигери улсын метроны 13 км урттай анхны шугам Даваа гарагт тус улсын санхүүгийн төв Лагос хотод нээгджээ.
Blue Line (Хөх шугам) нэртэй энэ шугамыг Хятадын China Civil Engineering Construction Corp компани байгуулсан байна.
Африк тивийн хамгийн олон хүн амтай Нигери улс 1983 онд анх метротой болох төлөвлөгөө баталж байжээ. Гэвч санхүүжилт болон удирдлагын шийдвэртэй холбоотой саад бэрхшээлүүдийн улмаас 40 жилийн дараа ашиглалтад орж байгаа нь энэ юм. Өнгөрсөн оны арванхоёрдугаар сард эрх баригчид метрог нээж, тууз хайчилсан ч өнөөдөр л зорчигч тээвэрлэж эхэлж байна.
20 сая гаруй оршин суугчидтай, замын түгжрэл ихтэй Лагос хотын нийтийн тээврийн асуудлыг метро шийднэ гэж найдаж байгаа.
Автомашинаар хоёр цаг зорчдог зайг шинэ метро 15 минутад туулж буйг Лагос хотын захиргаа мэдээлжээ.
Метроны хоёрдугаар шатны бүтээн байгуулалт энэ оны сүүлээр эхлэх гэнэ. Энэ шат дуусвал өдөр бүр 500,000 орчим зорчигч тээвэрлэдэг болох юм байна.
Эх сурвалж: Aljazeera
