Дэлхийн тэргүүлэгч эдийн засагтай, аж үйлдвэржсэн орнуудын удирдагчдын дээд хэмжээний уулзалт жил бүр болдог. Энэ жилийн уулзалтыг Энэтхэг улс зохион байгуулсан юм.
“G20” буюу “Хорийн бүлэг”-т 55 орны нэгдэл бүхий Африкийн Холбоог элсүүлэхийг гишүүн улсууд хүлээн зөвшөөрснөөр тус бүлэг шинэ гишүүнтэй болж байна.
Хоёр өдрийн турш үргэлжилсэн уулзалтаар улс орнууд дэлхийн эдийн засаг, хүнсний аюулгүй байдал, уур амьсгал, хүрээлэн буй орчин болон Орос-Украины дайны асуудлаар хэлэлцжээ.
Тодруулбал гишүүн улсууд дайнд ОХУ-г шууд буруутгаагүй ч Украинд энх тайван хэрэгтэй бөгөөд газар нутгийг нь хүчээр эзлэн түрэмгийлэх нь буруу гэдэгт санал нэгдсэн байна.
“G20”-ийн удирдагчид 2030 он гэхэд дэлхийн хэмжээнд сэргээгдэх эрчим хүчний хүчин чадлыг гурав дахин нэмэгдүүлэхээр тохиролцож, нүүрсний эрчим хүчийг бууруулалгүй багасгах шаардлагатайг хүлээн зөвшөөрсөн ч цаг уурын томоохон зорилтуудыг дэвшүүлж чадаагүй аж.
Мөн АНУ, Энэтхэг, Саудын Арабын удирдагчид Ойрхи Дорнод болон Өмнөд Ази, цаашлан Европыг холбосон төмөр зам, боомт байгуулах төлөвлөгөөтэй байгаагаа мэдэгджээ.
Энэтхэг улсын хувьд энэ жилийн уулзалтыг зохион байгуулсан нь дэлхийд дипломат харилцаа болон эдийн засгийн хувьд нөлөө бүхий улс гэдгээ зарлаж, Энэтхэгт хөрөнгө оруулалт, гадаад худалдааг татах боломж болсон гэв.
Харин ОХУ-ын Ерөнхийлөгч Владимир Путин, БНХАУ-ын удирдагч Ши Жиньпин нар энэ удаагийн уулзалтад оролцоогүй юм. Бүлгийн ирэх жилийн уулзалтын Бразил улсад зохион байгуулна.
Эх сурвалж: Ройтерс
