Сахараас айх ёстой юу?

C12H22O11 гэсэн химийн томъёогоор томъёологдох энэ бодисыг Энэтхэгчүүд анх цэврээр нь талсжуулан хүнсэнд хэрэглэсэн цагаас хойш дэлхий нийтэд тархан, амттанд дурлагч хүн төрөлхтөний гол хүнсний хэрэглээний нэг болсоор өдийг хүрчээ.  18-р зууныг хүртэл сахар тансаг хэрэглээнд тооцогдож байсан болохоор энэ бодисын төлөөх дайн тулаан ч бишгүй нэг болж, нишингэ манжин тариалахад боолын хөдөлмөр цэцэглэж байсан гэдэг. Юун одооных шиг харааж зүхэх, алт эрдэнэс шиг л байв.

Сахароз нь глюкоз, фруктозын молекул тэнцүү хэмжээгээр агуулдаг цэвэршүүлэн гаргаж авсан органик нэгдэл, нүүрсус юм. Байгаль дээр фотосинтезын (гэрэл нийлэгжилт) процессын үр дүнд үүсдэг бодис тул олон ургамал ногоо, жимс жимсгэнэд агуулагддаг.

Үүний дотроос чихрийн нишингэ, чихрийн манжинд өндөр агууламжтай байдаг тул уг ургамлыг тариалж, боловсруулан цэвэршүүлж бидний ширээн дээр ёотон болж ирдэг байх нь.  Refined буюу цэвэршүүлсэн сахарозын талст нь өөр ямар нэгэн бодис, микро элемент агуулдаггүй, химийн хувьд цэвэр, усанд болон ходоодны шингэнд амархан уусч глюкоз, фруктоз болж задардаг ба бодисын солилцоонд 1 грамм сахароз 3,9 ккалори энерги болон хувирдаг.

Хоол тэжээлээр авсан сахароз бодисын солилцоонд орж, шаардлагатай энерги үүсгэж, илүүдсэн нь булчин болон элгэнд нөөцлөгдөг. Илүүдвэл дараа нь хэрэглэх гээд бие махбод хүртэл зохицуулж байгаа биз.

Огцом дасгал хөдөлгөөн хийсний маргааш булчин хөндүүрлээд бүр мяардаг биздээ. Энэ нь булчинд хуримтлагдсан байсан чихэр сүүний хүчил болж исэлдэн, улмаар булчингаар өвдөх мэдрэмж төрүүлж байгаа хэрэг. Тэгэхээр турахын тулд яг яах ёстойг одоо ойлгож байна уу …

Сахарын хэрэглээ бүүр хэтрээд ирвэл өөх тос болон хувирч таргалалт үүсч эхэлдэг. Гайхаж магадгүй.

Чихэр иддэггүй мөртлөө таргаллаа гээд. Нэг юмыг маш сайн ойлгох хэрэгтэй. Бидний хэрэглэж байгаа үр тариа, гурилан бүтээгдэхүүн болон жимс ногоо сахароз биш юм аа гэхэд цардуул заавал агуулдаг. Цардуул сахароз хоёрын задралын эцсийн бүтээгдэхүүн (глюкоз) адилхан байдаг тул та чихэр иддэггүй гэж зөрүүдлээд нэмэргүй .

Цусан дахь сахарын хэмжээ ихэсдэг өвчтэй хүмүүс мэдээж сахар хэрэглэх хориотой байдаг. Гурил будаа гэх мэт цардуул агуулсан бүтээгдэхүүний задралын эцсийн бүтээгдэхүүн нь сахартай ялгаагүй тул мөн хориотой. Ийм хүмүүст зориулж, мөн бүтээгдэхүүний сахарын агууламжийг бууруулахын тулд уургийн гаралтай олон төрлийн сахар орлуулагчийг хэрэглэж болдог. Адилхан чихэрлэг мөртлөө сахар биш. Аспартам, сахарин, ксилитол гээд цааш хөвөрнө. Үүнийг дараа яринаа.

Өнөөдөр сахар хүнсний бараг бүхий л төрлийн үйлдвэрлэлийн гол болон туслах түүхий эдийн нэг болж байгаа ба өдөр тутмын хэрэглээний олон бүтээгдэхүүний орц найрлагад янз бүрийн үүрэгтэйгээр ордог. Хамгийн гол үүрэг нь амтлаг болгох. Хоёрдугаарт нөөшлөх. Гуравдугаарт ашигтай бактери агуулсан бүтээгдэхүүний тэжээлт орчин болох гэх мэтчилэн.

Сүү, янз бүрийн жимсний шүүс, чанамалд тухайн бүтээгдэхүүний хадгалалтын хугацааг уртасгах зорилгоор сахар хийдэг. Энэ нь сахарын уусмалын осмос (нэвчих) даралттай холбоотой байдаг. Зөгийн балыг мэднэ биздээ. Байж л байдаг. Муудахгүй. Энэ нь тухайн баланд хугацаа уртасгах бодис хийсэнд бус, их концентрацитай чихрэнд угаасаа өнөөх гайхлууд чинь үржиж чаддаггүй. Жимсний чанамал, лаазтай молоконд ийм зорилгоор л сахар хэрэглэдэг.

Манай оронд гэхэд цаг уураас шалтгаалаад жүрж, ханборгоцой, алим гэх мэт энэ гадуур шүүсийг нь савлаж зараад байгаа жимс ургадаггүй. Гэтэл яаж үйлдвэрлэгчид шүүсийг нь үйлдвэрлээд байнаа. Хүмүүс мэдэхгүй болохоороо наадуул чинь сироп найруулаад зарж байгаа гэх.

Жимс ургадаг газрынх нь үйлдвэрлэгчид ургаж буй жимсээ хурааж аваад шүүсийг нь шахаж сахартай хольж өтгөрүүлээд ариутгаж савлаад, уг өтгөрүүлсэн жимсний шүүсийг жимс ургадаггүй мань мэт орныхон нь эргүүлэн сэргээж ууж байгаа хэрэг.

Ерөөсөө тэр жимсэнд агуулагдах шимт бодис, аминдэм, бусад бодисыг хэвээр нь хадгалахын тулд сахар хийж хамгаалж байгаа хэрэг. Түүнээс хаа байсан тропикийн орноос жимсээр нь түүж авчраад шүүсийг нь шахаж бидэнд түгээх ёстой гэж муйхарлаж болохгүй шүү, тийм боломж ч байхгүй.

Сахароз нь цардуулаас илүү уусч задардаг тул гурилан бүтээгдэхүүний үйлдвэрлэлд исгэх процессыг сайжруулах, түргэтгэхийн тулд мөн хэрэглэдэг. Чихэрний амтгүй талхны зуурмагт ч бага зэргийн сахар хийхэд өнөөх муу дрожжиуд чинь “амилаад” л ажлаа хийж эхэлнэ. Сахартай усаар гурил зуурах, сахаргүй усаар гурил зуурах ямар ялгаатайг өөрсдөө туршаад үзэж болноо.

Мөн янз бүрийн ашигтай бактери агуулсан тараг, пробиотик бүтээгдэхүүнд сахар хийдэг учир нь тухайн бактериуд таны ходоодонд ортлоо саван дотроо чихрээр хооллоод амьд байж байдаг хэрэг. Үүнийг тэжээлт орчин гэж нэрлээд байгаа юм.

За энэ бодис яагаад “хор” болчихвоо?

Зарим “ухаантай” хүмүүс хэлэх байх. Энэ бодисоос болж таргалалт, түүнээс үүдэх олон төрлийн өвчин эмгэг, наад зах нь шүд цоорох, цаашлаад чихрийн шижин, тулай, хавдар хүртэл үүсгэж байна гэж. Зөв. Нэг өнцгөөс харвал зөв, үнэхээр зохицуулгагүй хэрэглэвэл ийм байдалд хүргэж мэднэ.

Түрүүн хэлсэнчлэн сахар ихэдвэл өөх тос болон биед хуримтлагдаж бүдүүн хүн болно. Үүнээс шалтгаалсан маш олон төрлийн өвчлөлүүд бий болно. Амны хөндийд үлдсэн сахар бактерийн нөлөөгөөр исэлдэж сүүний хүчил үүсгэж, нөгөө муу шүднүүдийн чинь эрдсийг уусгаад цоолж орхидог. Цоорхой шүдтэй эрүүл мэнд гэж ямар ч олигтой байхав. Гэх мэтчилэн та нартай адилхан, бүр та нараас ч илүү муулвал муулна дөө.

Гэхдээ би арай өөр өнцгөөс хардаг.

Зай гарвал чихэртэй юм идээд, завсар гарвал ундаа уугаад байвал ийм үр дүнд хүргэж болох юм. Энэ бол үйлдвэрлэгчийг бүтээгдэхүүндээ сахар ихээр хэрэглэж байна гэж шүүмжлэхээс илүү, хүн болгон хүнсний, идэж уудаг юмныхаа боловсролыг нэмэгдүүлээд идэвхитэй амьдарч чадвал сахар нэг их айгаад тэвдээд байх зүйл биш.

Сахар хийхгүй бол амт муутайг нь гайхаад авахгүй, хийхээр хор найрууллаа гэнэ. Сахар ихэдвэл ямар үр дагаварт хүрдэгийг, түүнээс хэрхэн сэргийлж болдогийг мэдээд тааруулж хэрэглэх юм бол үйлдвэрлэгчид хүссэн, хүсээгүй бууруулах чиглэлд л явна. Түүнээс миний хүүхэд чихэр их идээд байна, сахартай ундаа уугаад байна гээд үйлдвэрлэгч рүү буруугаа чихвэл ёстой нөгөө дарангуйлал чинь мөн биздээ.

Буруу зүйл болоход зөвхөн нэгэндээ тохоод, жигшиж зэвүүцээд байдаг шиг өвчлөл тохиолдоход сахар луу ч юм уу чихэх нь утгагүй хэрэг.

Яг одоо таны бие дотор нөгөө Баярцогтын 20000-н хувьсагчтай тэгшитгэл шиг үйл явц явагдаж байна. Нэг хувьсагч нь сахар юм гэхэд нөгөө хувьсагч нь дасгал хөдөлгөөн, өөр нэг нь таны хүнсний боловсрол, үлдсэн 19997 нь юу ч байдгийн ккк. Хувьсагчууд бүрэн байж л хариу нь “Эрүүл, сэтгэл хангалуун амьдрал” гэж гарна шүү ..

Хүнсний Инженер О. Гал-Очир