Шатахуун импортлогчид ч \”хоншооргүй\” зан гаргалаа даа

 

Гэтэл улс хямрал бидэн хамаагүй гэх \”хоншооргүй” нөхдүүд бас байх юм.
Ингээд бичихээр ээмэг бөгжөө өгөөгүй хүмүүсийг хэлж байна гэж битгий буруугаар
ойлгоорой. Амралтын өдрийг далимдуулаад л шатахууныхаа үнийг нэмчихсэн шатахуун импортлогчдыг \”хоншооргүй” хэмээн
буруутгах гээд байна.

 

Ам.долларын ханш, дизелт түлшний үнийн өсөлт зэргээс хамаарч шатахууныхаа
үнийг өсгөсөн гэж тайлбарлах байх л даа. Гэвч Монгол Улсын Засгийн газраас
шатахууныхаа үнийг л битгий өсгөөрэй хэмээн эдгээр аж ахуйн нэгжүүдэд үргэлж
буулт хийсээр ирсэн байдаг. Хямралтай, хүндрэлтэй байгаа хэдий ч шатахууны
үнийг л өсгөж болохгүй юм шүү гэсэн дээ улс төсвийн орлогыг 110 тэрбум
төгрөгөөр тасалдуулаад ч хамаагүй тэдгээр компаниудад татварын урамшуулал
олгосон байгаа юм.

 

Автобензин, дизель түлшний онцгой албан татварын хэмжээг бууруулах шийдвэр
гаргасан Засгийн газрын хуралдааны талаар бичээд байна л даа. Энэ шийдвэр ердөө
хоёр долоо хоногийн өмнө гарч байлаа. Гэтэл татварын хэмжээг бууруулаад байхад
л үгсэн хуувилдаад үнэ нэмчихэж байна. Дор бүрнээ хэмнэж, улс даяар эх оронч сэтгэл гаргаж байхад шатахуун
импортлогчид өөрсдийнхөө ашгийг тэргүүнд тавьчихлаа. Энэ олон автомашин
хөдлөхийн тулд бензин авч л таараа гэж бассан хэрэг л дээ.

Ийм хоншооргүй нөхдүүдийг зах зээлээс шахаад гаргачих юмсан. Банкны
ялзралыг арилгахын тулд Хятадын банкыг оруулж ирэх нь зүйтэй гэдэг шиг шатахуун
импортлогчдын дур зоргоороо аашилж буй энэ үйлдлийг таслан зогсоохын тулд
шатахуун худалдаалдаг Оросын нэг компанийг оруулаад ирчихмээр санагдаж байна. Энэ
тохиолдолд өрсөлдөөнөө дагаад үнэ нь буурч л таараа. Татвараас хөнгөлөөд байхад
л үнээ нэмж даварч байгаа шатахуун импортлогчдод ийм л арга хэмжээ авч байж
ухамсар суулгах болов уу даа.

Үндэстэн агентлаг