Улсын Их Хурлын Төрийн байгуулалтын байнгын хорооноос өчигдөр /2024.01.02/ Сонгуулийн ерөнхий хорооны гишүүнд нэр дэвшигчтэй хийх нэр дэвшигчийн сонсголыг зохион байгууллаа.
Сонсгол даргалагч Ж.Сүхбаатар:
– 2024 оны сонгуульд хоёр юм явна гээд байна. Цахим сурталчилгааны дайн буюу улс төрийн захиалгат хуурамч мэдээлэл юм.
Тагнуулын ерөнхий газар, АТГ-ын хажууд СЕХ-ны үйл ажиллагааны хүчин чадал сул харагддаг, тиймээс дээрх нөхцөл байдалд ажиллах чадвар бий юу. Хуурамч хаяг хайж олох бол наад захын асуудал. Технологийн нөхцөл байдлыг чинь хүмүүс мэдэж байх вий.
Мэдээллийн технологийн чиглэлээр ажилладаг залуус том бүлэг, баг байгуулж сонгуулийн үеэр нөлөөлж ажиллана гэж яригдаад байна. Энэ чинь бараг тусгаар тогтнолын асуудал болсон.
Сонгуулийн үйл ажиллагаанд том гүрнүүд хүртэл хөл алдаж байна. Үүнд АНУ, Европын орнуудыг дурдаж болно. Манайд Кибер аюулгүй байдалтай тэмцэх төв байгуулагдсан. Нэр дэвшигчдийг төрхийг дуурайлган хийсэн хуурамч бичлэг тарахыг үгүйсгэхгүй. Үүнд бэлтгэлтэй байна уу, зөвхөн цагдаа л хариуцаад байвал энэ асуудал бүтэхгүй, хэдэн хүнийг зөрчлийн хуулиар торгоод байж болохгүй.
Тэгэхээр ийм цахим асуудалд ямар арга хэмжээ авч, хяналт тавихаар төлөвлөж байна вэ.
