Нийтийн тээврийн маршрут шинэчилсэн асуудлаар хуучин хотын мээр Э.Бат-Үүл хотын шинэхэн дарга Х.Нямбаатарт цахим хуудсаараа дамжуулан зөвлөгөө өглөө.
Тэрээр, “Дэлхий даяар нийтийн тээврийнхээ үйлчилгээний маршрутыг сольж, өөрчилдөг. Жишээлбэл, бид 2015 онд автобусны чиглэлийг өөрчлөх дорвитой өөрчлөлтийг хийсэн. Энэ өөрчлөлтийн үр дүнд автобусны үйлчилгээний хуваарилалт сайжирсан, автобусанд чихдэлцэж явахаа больсон. Гэхдээ энэ өөрчлөлтийг наймдугаар сард хийж байсан юм. Автобусны маршрутыг өөрчлөх ажлыг хаана ч идэр есийн хүйтэнд хийдэггүй юм. Тиймээс автобусны маршрут өөрчлөлтийг бид наймдугаар сард хийсэн. Ингэж хийхээсээ өмнө хоёр сар ард иргэдэд маршрутаа сурталчилж, бараг цээжлүүлсэн. Хэрэв маршрутыг өөрчлөх гэж байвал заавал дулааны улиралд хийх ёстой.
Миний үед байсан нийслэлийн нийтийн тээврийн газрын дарга тээвэр үйлчилгээний мэргэжилтэн, энэ чиглэлээр сургууль төгссөн хүн байсан. Тухайн үеийн нийслэлийн тээврийн газрыг мэргэжлийн хүмүүс удирдаж байсан. Харин сая мэргэжлийн бус хүмүүс удирдсан юм байна. Хэвлэл мэдээллээр сонсож байхад цагдаагийн ажилтан байсан хүн тээврийн газрын дарга болсон байна. Ийм мэргэжлийн бус хүн удирдаж, маш энгийн шаардлага дүрмийг ойлгохгүй идэр есийн хүйтэн иргэдийг нэлээд самгардууллаа.
Маршрут өөрчлөх үйл ажиллагаа манайд хараахан төлөвшөөгүй байгаа юм. Бид Австрийн Венад хотод очиж туршлага судалсан. 2015 оны маршрутын өөрчлөлтийг хийх гэж хоёр жил туршлага судалж, судалгаа хийсэн. Австрийн Вена хот бол маршрутыг зөв тогтоосноороо европ байтугай дэлхийд тэргүүлдэг. Судалгаа хийж байхдаа нэг зүйлийг хараад бид хаа ч хүрээгүй юм байна гэж бодсон. Өөрөөр хэлбэл, автобусны маршрут судалдаг том хүрээлэн байдаг юм байна. Тэр хүрээлэн нь математикчидаар дүүрчихсэн байсан. Тэгэхээр маршрутын судалгааны үйл ажиллагааг шинжлэх ухааны үндэслэлтэй хийдэг юм байна.
Хотын даргад зөвлөе, Х.Нямбаатар даргын хийж байгаа ажлыг харж байхад санаатай юмыг муутгаад байгаа юм биш. Мэдэхгүй, чадахгүй юм их байна. Тиймээс бид тал талаас нь хэлж зөвлөмөөр байна. Уг нь, Х.Нямбаатар дарга урьдчилж ярилцаад иргэдээс асуусан бол автобусны маршрутыг ид хүйтэнд өөрчилж болохгүй гэдгийг бүгд хэлэх байсан байх. Тэгсэн бол иргэдэд маш их төвөг, чирэгдэл болохгүй байсан. Гэтэл Х.Нямбаатар дарга маршрутын асуудлыг авлигатай холбож яриад байна. Хүмүүсийн бухимдал дээр зөрүүлж шантаажлаад байгаа юм шиг, дарамтлаад байгаа юм шиг бүх зүйлийг авлигатай холбож иргэдийн санаа бодлыг гутаах хэрэггүй хэмээлээ.
