Ерөнхий сайд гаргасан тогтоолоо зөрчив

Засгийн газрын
хэрэг эрхлэх газраас Үндсэн хуулийн цэцийн даргад авч өгсөн лексус 570
автомашиныг дагасан улс төрчилт газар авлаа. Бүдэрсэн дээр нь түлхэнэ гэгчээр
ард түмэнд сайхан харагдах хүсэлтэй бүгд л энэ мэдээллээр Засгийн газрыг
үгүйсгэж, өөрсдөө нэр хүнд олж авах шоу хийж байна.

 

Тэдгээр улс
төрчдийн нэг нь О.Баасанхүү гишүүн. ЗГХЭГ-аас 200 орчим сая төгрөгийн үнэтэй
автомашин Үндсэн хуулийн цэцийн даргад авч өгсөн нь ноцтой асуудал. Үүнийг
ноцтой гэдгийг Ц.Нямдорж гишүүнээр ахлуулсан ажлын хэсэг баталж улмаар АТГ-аас
уг асуудалд анхаарлаа хандуулж шалгах хэрэгтэй гэдгийг ч мэдэгдээд байгаа.

 Өөрөө Ланд 200 унадаг байж, нэг төрийн албан хаагч унахаар улс төрждөгөө боль

Тэгвэл өчигдрийн
чуулганы хуралдааны үеэр О.Баасанхүү гишүүний улс төрчилтөд Ерөнхий сайд
Ч.Сайханбилэг \”гишүүнээ одоо наад утга учиргүй улс төрөө боль. Нөөц хөрөнгөнөөс
нэг ч төгрөг шилжээгүй. Мөн таны яриад байгаа автомашиныг төсвийн нэг ч
төгрөгөөр авдаггүй юм. Автобааз гээд улсын үйлдвэрийн газар байгаа. Өөрийн үйл
ажиллагааны орлогоос автомашин худалдан авдаг. Үүнийг та мэднэ. Гэвч мэдсээр
байж ийм зүйлийг ярьж улс төржихөө боль. Таны хэлснээр том автомашиныг төрийн
албанд ашиглах нь буруу гэж үзэж байгаа бол та өөрийн унаж хэрэглэж байгаа
Засгийн газрын автобаазаас өгсөн Ланд 200 жийп автомашинаа буцаагаад өгчих.
Тэрийг чинь бусад хэрэгтэйд нь өгөөд явъя. Та өөрөө болохоор Ланд 200 унаад
байж болдог, өөр нэг төрийн албан хаагч унахаар асар том улс төр болгоод яриад
байх юм. Та өөрийнхөө унаж байгаа Ланд 200-г өг тэгвэл” хэмээн бухимдлаа
илэрхийлэв.

 Хураагдсан автомашинаа хэрэглүүээд араас нь гүтгэх нь эдийн д арга 

Харин Ерөнхий
сайдын бухимдалд О.Баасанхүү гишүүн фейсбүүкээр дамжуулан \”Би албан ёсоор хэлье.
Би Байнгын хорооны даргын хувьд Засгийн газрын Ланд 200-г дуудлагаар
хэрэглэдэг. Энэ машиныг хэрэглэхгүй байж болно. Жолоо ч машин хоёулаа Засгийн
газрын өмч. УИХ-ын нэр дээр автомашин байдаггүй. Хураагдсан автомашинаа
Өргөдлийн байнгын хороонд хэрэглүүлээд араас нь гүтгэх нь эдний л арга шүү дээ.
Ч.Сайханбилэг намайг гэрэг эрхлэхийн дарга болгон андуурсанд гайхаж байна” тайлбар
хийжээ.

 Ерөнхий сайд өөрийнхөө гаргасан тогтоолыг зөрчиж байна

Чухам хэнийх нь зөв
болохыг цаг хугацаа тодруулах биз. Гэвч Засгийн газраас тэр тусмаа Ерөнхий сайд
Ч.Сайханбилэг өөрөө \”төрийн байгууллагуудад шатахуун их зарцуулдаг том оврын
жийп автомашин унахыг хориглосон, хязгаарласан” шийдвэр гаргаж байсан шүү дээ.
Харин гаргасан шийдвэрийг нь дүгнэж амжаагүй байхад төрийн албаныхан том машин
унаж болдоггүй юм уу гээд УИХ-ын гишүүнтэй хэрүүл хийгээд байж байх хэр
оновчтой вэ. О.Баасанхүүгийн хувьд шинэ гишүүн. Тиймээс автомашинуудыг төсвийн
мөнгөөр худалдан авч байна гээд ард иргэд шигээ бодож явдаг мэдлэг дутмаг байж
болох л юм. Харин Ерөнхий сайд жилийн өмнө гаргасан тогтоол захирамжаа зөрчөөд
төрийн албанд том автомашин хэрэглэх тухай яриад явж байх нь ойлгомжгүй
санагдлаа.

А.Аюуш