Улсын Онцгой Комисс(УОК)-оос шар усны үер болон ой, хээрийн түймрийн нөхцөл байдлын талаар өнөөдөр мэдээлэл өглөө.
УОК-ын Нарийн бичгийн дарга Т.Баярхүү “Цаг уур, орчны шинжилгээний газраас дөрөвдүгээр сарын 1-ний байдлаар улсын хэмжээнд төмөр зудтай нэг сум, цагаан зудтай зургаан аймгийн 17 сум, цагаанаар зудархуу долоон аймгийн 13 сум, нийслэлийн нэг дүүрэг байна.
Одоогоор малын хорогдол 6.3 саяд хүрсэн. Энэ нь нийт малын 6.9 хувьтай тэнцэх тоо юм. Цаг агаар дулаарч байгаа учраас голуудын сав нутгаар шар усны үеэр буух эрсдэл өндөр байна.
Өнөөдрийн байдлаар Сэлбэ, Санзай орчимд мөсөн дээгүүр устай байна. Сэлбэ, Дамба орчмын усны түвшин 131 см байгаа юм.
2024 он гарснаар давхардсан тоогоор нийслэлийн есөн дүүрэг, 10 аймгийн 14 суманд голын халианы усанд автсан дөрөв, гүний болон хөрсний шар усанд автсан 88 тохиолдлын дагуу Онцгой байдлын алба хаагчид ажилласан” хэмээн ярив.
Үргэлжлүүлэн нийслэлийн Онцгой комиссын Нарийн бичгийн дарга, хурандаа Д.Оюунбат “2024 оны нэгдүгээр сарын 1-нээс хойш шар усны дуудлага 110 удаа ирсэн. Шар усны үерийн эрсдэлтэй бүсэд буусан 388 айл өрх зөвшөөрөлгүй, 1,487 айл өрх зөвшөөрөлтэй боловч эрсдэлтэй бүсэд амьдарч байгаа.
Одоогоор 521 алба хаагч, 138 машин механизмтай 10,000 орчим тонн усыг соруулж, 5,600 тонн суваг татаж, зургаан гүүрний сувагчлалыг гаргаж, 150 тонн мөс зөөвөрлөсөн. 10 орчим тонн лаг шаврыг зөөвөрлөсөн байна” гэв.
Ой хээрийн түймрийн талаар ОБЕГ-ын Гал түймэртэй тэмцэх газрын дарга, хурандаа Ц.Нямбаяр “Энэ онд улсын хэмжээнд зургаан аймгийн 10 суманд 12 удаагийн ой, хээрийн түймэр гарсан. Өчигдөр гарсан Сүхбаатар аймгийн Эрдэнэцагаан, Асгат сумын түймрийг өнөөдөр өглөө унтраасан.
Сүхбаатарын Эрдэнэцагаан суманд гарсан түймэр нь айлын өвөлжөөнөөс эхэлсэн гэх мэдээлэл Онцгой байдлын ерөнхий газарт бүртгэгдсэн. ОБЕГ-аас хүргэж буй гал түймрийн аюулаас урьдчилан сэргийлэх мэдээллийг иргэд өдөр тутмын үйл ажиллагаанд хэрэглэх шаардлагатай байна.
Өчигдөр Улаанбаатар хотод шар өвсний түймрийн гурван удаагийн дуудлага бүртгэгдсэний дагуу НОБГ-ын алба хаагчид ажилласан. Хаврын дулааны улиралд хашаа хороогоо цэвэрлэх, аялал зугаалгаар явах үедээ байгаль орчинд ил задгай гал гаргахгүй, татсан тамхи болон чүдэнзний ишийг хаяхгүй байхыг анхааруулж байна” хэмээн ярив.
