Засгийн газрын ээлжит хуралдаан болж, нийт 20 орчим асуудлыг хэлэлцжээ. Мөн хуралдаанаар төр нийгмийн зүтгэлтэн С.Зоригийг хөнөөсөн хэргийг шалгах, Чимгээ, Содномдаржаа нарын хохирлыг барагдуулах Ажлын хэсгийг байгуулж, Ажлын хэсгийн ахлагчаар ХЗДХ-ийн Дэд сайд Б.Солонгоог томилсон байна.
ХЗДХ-ийн Дэд сайд, Ажлын хэсгийн ахлагч Б.Солонгоо: Ажлын хэсэг зөвлөлдсөнөөр Хүний эрхийн үндэсний комисс, Шүүхийн ерөнхий зөвлөл, Эмнести интернешнл олон улсын байгууллага, Засгийн газрын харьяа ЦЕГ, ТЕГ-ын төлөөллүүд хамтран ажиллахаар боллоо. Ажлын хэсгийн үндсэн зорилго нь төр нийгмийн зүтгэлтэн С.Зоригийг хөнөөсөн хэрэгтэй хэрэгтэй холбогдуулаад гурван шатны шүүхээс ял шийтгэл аваад байсан Т.Чимгээ, Б.Содномдаржаа нарын эрхийг сэргээх, хохирлыг нөхөн барагдуулах юм. Мөн одоогоор олон улсын байгууллагуудтай хамтарч ажиллахаар болж байна.
Та бүхэн санаж байгаа бол өмнө нь эдгээр иргэдийг яллагдагчаар татсан прокурорын тогтоолыг хүчингүй болгосон. Үүнээс хойш Т.Чимгээ болон Б.Содномдаржаа нар өөрсдийн зөрчигдсөн эрхийг сэргээхтэй холбогдуулаад холбогдох ажлыг хийсэн байна. Харамсалтай нь, нөхөн төлбөрийн ажил удаашралтай байна. Тиймээс үүнтэй холбоотойгоор Засгийн газраас тусгайлсан ажлын хэсэг байгуулж байна.
Монгол Улсын иргэн бүр Монгол Улсын Үндсэн хуульд заасан эрхийг баталгаатай эдлэх суурь эрхтэй. Эдгээр баталгааг төрөөс Үндсэн хууль, бусад хуулиар олгосон. Үүнд багтсан нэг үндсэн эрх нь эрүүдэн шүүлтээс ангид байх болон хэрцгийгээр хүнлэг бус харьцахаас урьдчилан сэргийлэх ажлыг төрөөс авч хэрэгжүүлэх шаардлагатай. Монгол Улсын Т.Чимгээ болон Б.Содномдаржаа нарын Үндсэн хуульд заасан халдашгүй чөлөөтэй байх эрх зөрчигдсөн болон эрүү шүүлтийг тулгасантай холбоотойгоор Засгийн газраас тодорхой ажлыг хийхээр олон улсын байгууллагатай хамтарч ажиллахаар болж байна. Тэр дундаа НҮБ-ын хүний эрхийн хороо, эрүүдэн шүүлтийн эсрэг ажилладаг дэд хороотой хамтран ажиллахаар төлөвлөж байна.
Энэ ажлын хүрээнд ажлын хэсэг асуудлыг судалж, уг хоёр иргэнтэй биечилсэн уулзалтыг хийнэ. Мөн цаашид олон улсын экспертүүд болон бусад олон улсын зөвлөхүүдтэй хамтарч ажиллана.
Асуулт асууж, хариулт өгөв.
–Сонгууль бүрийн С.Зоригийг хөнөөсөн хэргийг гаргаж ирдэг шоу болчихлоо. Үүнээс өмнө шийдэх боломж байгаагүй юу. Энэ хэргийн талаар мэдээллийг олон нийтэд нээлттэй болгох боломжгүй юу?
-Өнөөдөр ЦЕГ-т ажлын хэсэг ажиллаж байгаа. Мөрдөн шалгах ажиллагааны хэрэг бүртгэлтэй холбоотой мэдээллийг Засгийн газраас өгөх боломжгүй. Ажлын хэсгийн үндсэн зорилго бол Т.Чимгээ, Б.Содномдаржаа нарын эрхийг сэргээх, хохирлыг барагдуулах, нөхөн төлбөр олгох, дэмжлэг үзүүлэх байгаа. Тэгэхээр хэрэг хянан шийдвэрлэх ажиллагаа, мөрдөн байцаах ажиллагаа, холбогдох хуулийн дагуу үргэлжилж байна.
–Энэ хоёр иргэний хохирол нөхөн төлбөр нь хэд байгаа юм. Мөн мөрдөн шалгах ажиллагааг явуулж байна гэхээр Т.Чимгээ, Б.Содномдаржаа нар хэргийн сэжигтэн хэвээр байгаа гэсэн үг үү?
-Бидэнд байгаа мэдээллээр уг иргэдийг яллагдагчаар татсан прокурорын тогтоолыг хүчингүй болгож шийдвэрлэсэн. Тэгэхээр одоогоор сэжигтэн гэж үзээгүй. Гэхдээ мөрдөн шалгах ажиллагааны явцад холбогдох ажлын хэсгээс дэлгэрэнгүй мэдээллийг өгнө. Гэхдээ эдгээр иргэний нэгэнт зөрчигдсөн эрхийг сэргээх асуудал яригдаж байгаа учраас бидний хувьд Засгийн газраас шаардлагатай бүхий л дэмжлэгийг үзүүлэх чиглэлээр ажиллаж байна.
