Гурилын импортын татварыг тэглэхтэй холбоотой Засгийн газрын тогтоолын талаар ЗГХЭГ-ын дарга Д.Амарбаясгалан танилцууллаа.
Тодруулбал хүнсний улаан буудайн дотоодын хэрэгцээнээс давсан хэсгийг экспортлох шийдвэр гарчээ.
Энэ тухай “Монгол Улсын бүх төрлийн гурил хилийн цаана худалдаалагдаж байгаа гурилаас 3-4 дахин өндөр үнээр зарагдаж байна. Гурилын салбарт давамгай байдал бий болж, үнийг нь өндөр түвшинд тогтоосон гэж Засгийн газраас үзсэн. 600-700 грамм гурилаар үйлдвэрлэж байгаа гурилан бүтээгдэхүүний үнэ иргэдийн худалдан авах чадварт шууд нөлөөлж байна.
Үндсэндээ 9,000 орчим төгрөгөөр 600-700 грамм жинтэй гурилан бүтээгдэхүүн худалдан авч байгаа нь ард иргэдийн амьжиргаанд шууд нөлөөлж буй.
Гурил, гурилан бүтээгдэхүүн нь инфляцын 30 орчим хувьд нөлөөлдөг учраас үнийг зах зээлийн өрсөлдөөнд оруулах зарчмаар буулгасан тохиолдолд инфляц буурах боломжтой.
Инфляц долоон хувьд тогтсон байгааг статистик мэдээллээс харж байна. Хэрэв гурил болон гурилан бүтээгдэхүүний үнэ хямдарвал инфляц дахин буурна. Инфляц буурвал арилжааны банкны хүү буурах нөхцөл бүрддэг. Тиймээс эдийн засагт эерэг нөлөөлөл үзүүлэх шийдвэр.
УИХ-д байгуулагдсан ажлын хэсэг энэ асуудлаар ойрын хугацаанд шийдвэр гаргах байх. Үүнтэй холбогдуулан улаан буудайн тариаланчид яах вэ гэдэг асуудал дагалдана.
Улаан буудайн салбар уналтад орох уу эсвэл илүү баталгаатай, өргөн хүрээгээр улаан буудай тариалах нөхцөл боломж бүрдэх үү гэдгийг тариаланчид асууж байгаа.
Засгийн газраас улаан буудайн салбар эрсдэлд орохгүй байх бодлогыг барьж байна” хэмээв.
“Улаан буудайн экспортоос жилд 300-500 сая ам.долларыг олох боломжийг нээнэ”
Үргэлжлүүлэн “Олон жилийн турш ердөө 400,000-хан тонн улаан буудай тарих орон зайд бизнес эхлүүлж байсан.
Өөрөөр хэлбэл дотоодын хүнсний хэрэглээнд шаардлагатай байгаа улаан буудайн нөөцийг хангасны дараа илүүдэл улаан буудайг экспортод гаргана.
Улаан буудайн тариаланчдын хувьд жилд зарсан улаан буудайн дундаж үнийг харахад 750,000 төгрөгөөр зарсан байна. Ингэж зарж байгаа нь тариаланчдын цаашдын өсөж хөгжих боломжийг хязгаарлаж байгаа явдал.
Гурилын үйлдвэрүүд монопол болсны үндсэнд улаан буудайн салбарт өрсөлдөөн болох, биржээр улаан буудайг зарах нөхцөл боломж бүрдэхээ байсан. Тиймээс үнийн доод хязгаарыг жил болгон тогтоож өгдөг байя. Түүнээс дээш биржээр болон өрсөлдөөний зарчмаар улаан буудайг зарж борлуулах боломжийг тариаланчдад олгоё.
400,000 тонноор хязгаарлагдаж байсан зах зээлийг нээж, экспортод гаргах замаар жилд 1,000,000-2,000,000 тонныг тарьж ургуулж, борлуулах боломжийг нээж өгье. Ингэж чадвал улаан буудайн экспортоос жилд 300-500 сая ам.долларыг олох боломж давхар нээгдэж байгаа.
Экспортыг чөлөөлөх, улаан буудайн доод үнийг тогтоох Засгийн газрын тогтоол албан ёсоор гарсан” гэж ЗГХЭГ-ын дарга Д.Амарбаясгалан хэлэв.
