Б.Гарамгайбаатар, Н.Батбаяр нарыг яагаад баривчлав

 

Хөгжлийн банктай холбоотой асуудлаар тус
банкны хуучин удирдлагууд шалгагдаж байгаа. Гүйцэтгэх захирал асан Н.Мөнхбатыг
АТГ-аас шалгаж, цагдан хорьсон тухай мэдээлэл ч цацагдаж байсан билээ. Тэгвэл
өчигдөр уг хэрэгт холбогдуулан Эдийн засгийн хөгжлийн сайд асан Н.Батбаярыг
цагдан хорьж шалгахаар болсон тухай мэдээллийг албаны хүн өгч байна.

 

Түүнийг албан тушаал эрх мэдлээ урвуулан
ашиглаж, улсад их хэмжээний хохирол учруулсан хэрэгт шалгаж байгаа юм.

 

Тэгвэл Н.Батбаяртай хамт УИХ-ын гишүүн асан
Б.Гарамгайбаатар \”ачигдлаа”. Түүнийг мөн л Хөгжлийн банктай холбоотой, их
хэмжээний санхүүжилт авч, өөрийн үүсгэн байгуулсан компанидаа дамжуулан өгсөн,
эрх мэдэл, албан тушаалаа ашигласан хэрэгт буруутгажээ.

 

Б.Гарамгайбаатарын холбогдсон хэрэгт түүний
хүү \”Монроуд” компанийн захирал Г.Тэнгис, тус компанийн нягтлан бодогч
Б.Оюунцэцэг нар татагдаж шалгагдаж байгаа гэнэ.

 

 

2008 онд 100 км хатуу хучилттай замын ажлыг
Б.Гарамгайбаатарын \”Монроуд” компани эхлүүлж байсан. Санхүүлжилтээ гүйцэт авсан
боловч замын 30-аад хувийг гүйцэтгээд ажлаа зогсоосон байна. Улмаар энэ ажил
дээр дахин тендер зарлаж, дуусгаж байжээ.

 

 

2012 оны дөрөвдүгээр сарын 27-нд Зам, тээвэр, барилга, хот
байгуулалтын яамнаас Халзан бүргэдэй-Солонготын даваа чиглэлийн хатуу хучилттай
авто замын барилгын ажлын тендер шалгаруулахад тендерт \”Монроуд” компани
материалаа ирүүлж 37.2 тэрбум төгрөгөөр замын ажлыг гүйцэтгэхээр болж Засгийн
газрын 2012 оны 110 дугаар тогтоолоор Хөгжлийн банкны санхүүжилтээр Халзан
бүргэдэй-Солонготын даваа чиглэлийн замын үлдсэн хэсгийг \”Монроуд” компаниар
гүйцэтгүүлэхээр болжээ. Уг тогтоолоор замын төсөвт өртөг нь 37 тэрбум 231 сая
300 мянган төгрөг байх бөгөөд бүгдийг нь Хөгжлийн банк санхүүжүүлэх бөгөөд 2012
онд гурав, 2013 онд 32 тэрбум 369.7 сая, дараа жил нь нэг тэрбум 800 сая
төгрөгийн санхүүжилт хийхээр болсон байна. Гэтэл үүнээс жилийн дараа буюу 2013
онд Хөгжлийн банк санхүүжилт хийх төслийнхөө талаар Эдийн засгийн хөгжлийн
яаманд танилцуулга хийжээ. Ингэхдээ гүйцэтгэгч компани дээрх ажлыг анх тогтсон
үнээрээ гүйцэтгэх боломжгүй гэх асуудал яригджээ. Тухайн үед Чингис
бондын хөрөнгөөр санхүүжүүлэх төсөл хөтөлбөрүүдийг Б.Гарамгайбаатарын
даргалдаг Эдийн засгийн байнгын хороо хэлэлцэж байв. Энэ үед
38 хувийн гүйцэтгэлтэй замыг шинээр засахаар төсөл оруулж
\”дөнгөсөн\” байна. Эл асуудлыг тухайн үед хэн ч анзаараагүй мэт чимээгүй
өнгөрсөн байдаг. Санхүүжилт хийх хөрөнгө нь бас л нэмэгдэж 46 тэрбум 354 сая
400 мянган төгрөг байхаар тооцоолжээ. Энэ тооцоог Эдийн засгийн хөгжлийн яам
Засгийн газрын хуралдаанд оруулж дахин 124 дүгээр тогтоол батлуулсан байна. Үүнийг л АТГ шалгаж,
Б.Гарамгайбаатарыг саатуулан шалгах шалтгаан болсон болов уу гэж таамаглаж
байна.

 

Үндэстэн агентлаг