“CS2” буюу “Counter Strike 2” төрлийн “YaLLa Compass 2024” тэмцээн Абу Даби хотноо болж тив бүрийн шилдэг 12 баг оролцож, Монголын “The MongolZ” баг түрүүллээ. Тэд саяхан Улаанбаатар хотноо болсон 100 мянган ам.долларын шагналын сантай “Nomadic Masters” тэмцээнд түрүүлээд байсан юм.
Финалын тоглолт өчигдөр/2024.06.09/ болж, “The MongolZ”-ийн эсрэг “NIP” буюу “Ninjas in Pyjamas” тоглож, гурван ээлжийн тоглолт гарч, 2-1 гэсэн харьцаатай Монголын багийн ялалтаар өндөрлөжээ.
“The MongolZ” энэ тэмцээний турш “Sashi”, “ENCE”, “HEROIC”, “NIP”, “Astralis” гээд дэлхийн шилдэг багуудыг толгойн дараалан буулган авсан байна.
Тэмцээний MVP буюу Шилдэг тоглогчоор “910” буюу Б.Өсөхбаяр тодорч, онцгой амжилтын эзэн болжээ.
