Өнгөрсөн жилийн баяр наадмын үндэсний бөхийн барилдааны түрүү бөх М.Бадарчид өвдөг шороодсон бөхчүүдэд улсын цол, чимэг нөхөн олгох арга хэмжээ Төрийн ордонд өнөөдөр боллоо.
Энэ үеэр шинээр улсын арслан цол хүртсэн Ц.Бямба-Отгон допингийн талаар өөрийн байр сууриа хуваалцав.
Тэрбээр “Төр засгийн шийдвэрийг хүндэтгэж улсын арслан цол авлаа, сайхан байна. Наадмаар давж цол авсан бол сайхан байх байсан. Үндэсний бөхийг хамгийн муухай харагдуулж буй зүйл бол допинг юм.
Энэ шийдвэр бөхөөр хичээллэж буй залууст томоохон сургамж, үлгэр дуурайлал боллоо. Би анх аймгийн заан байх үедээ допингийн шинжилгээ өгөхөд айдастай байсан. Олны дунд “гүтгэдэг” гэсэн яриа байдаг. Анх шинжилгээ өгч буй залууст энэ нь хүндрэлтэй.
Сүүлийн хоёр шинжилгээ өгөхдөө итгэлтэй өгсөн. Ер нь допингийн шинжилгээнд итгэлтэй байдаг.
Би үндэсний бөхийн холбоонд явцын шинжилгээ авах талаар хүсэлт өгсөн. Энэ жилийн хувьд бөхчүүдээс явцын шинжилгээ авсангүй. Энэ нь үндэсний их баяр наадамд дээгүүр даваанд барилдсан бөхчүүдээс допингийн төрлийн бодис илрэхээс сэргийлнэ.
Уг нь хавар, намартаа явцын шинжилгээ аваад явчихвал баяр наадамд дээгүүр барилдах бөхчүүд хангалттай хамрагдана. Үндэсний их баяр наадын бөхийн барилдаан цэвэр зохиогдох боломж бол өвөл, хаврын явцын шинжилгээ гэж харж байгаа” хэмээн ярилаа.
