Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын соёл, урлагийн үзвэр, үйлчилгээний хөтөлбөрийг танилцуулж байна.
Алдарт “The Hu” хамтлаг наадмын өмнөх өдөр Монгол дахь анхны бие даасан тоглолтоо хийх гэж байна.
“Хүннү рок” урсгалыг үндэслэгч, Монгол үндэстний хөгжмийг рок дуугаралттай хослуулан дэлхий дахинаа өөрийн өнгө төрхийг тодорхойлж буй “Чингис хаан” одонт хамтлаг юм. Тоглолт энэ сарын 10-ны өдрийн 18 цагаас Шангри-Ла зочид буудлын баруун талын “Hit” паркт болно.
ЖАНЖИН Д.СҮХБААТАРЫН ТАЛБАЙД “УЧИРТАЙ 3 ТОЛГОЙ” ДУУРЬ ОЛНЫ ХҮРТЭЭЛ БОЛНО
“Учиртай гурван толгой” дуурийг долоодугаар сарын 10-ны 21:00 цагаас төв талбайд тоглоно.
Тулгар төрийн 2233, Их Монгол улсын 818, Үндэсний эрх чөлөө, Тусгаар тогтнолоо сэргээн мандуулсны 113, ардын хувьсгалын 103 жилийн ойн Үндэсний их баяр наадмын хүрээнд нийслэлийн Засаг дарга бөгөөд Улаанбаатар хотын Захирагч Х.Нямбаатарын санаачилгаар Монголын анхны дуурь болох Б.Дамдинсүрэн, Б.Смирнов нарын “Учиртай гурван толгой” дуурийг энэ сарын 10-ны 21:00 цагаас Д.Сүхбаатарын талбайд тоглож, иргэд, жуулчдын хүртээл болгох аж.
ЛУВРЫН МУЗЕЙД ХАДГАЛЖ БУЙ МОНГОЛЧУУДЫН ТҮҮХЭН ДУРСГАЛУУДЫН ТУСГАЙ ҮЗЭСГЭЛЭНГ НЭЭЛЭЭ
Францаас 11 хайрцаг ачаа ирлээ. Дэлхийн өнцөг булан бүрд тархсан, Монголын гэх харьяалалтай дурсгалуудын цуглуулга аж.
Тухайлбал, Монгол нутагт байхгүй Хүннү, Ил хаант улсын үеийн дурсгал, Юань улсын үеийн сонгодог ваар шаазан, Киданы өв, соёлын дээжис багтаж буй. Эдгээр үзмэрүүдийг “Чингис хаан: Монголчууд дэлхийг өөрчилсөн нь” дэглэлтээр Чингис хаан Үндэсний музейд дэлгэж байна. Одоогоор үзэсгэлэн олон нийтэд нээлттэй буй бөгөөд наймдугаар сарын 25-ныг хүртэл үргэлжилнэ.
ЭНЭ САРЫН 9-15-НЫ ӨДРҮҮДЭД УЛААНБААТАР ТЕАТРТ “ТАЛ НУТГИЙН АЯЛГУУ” КОНЦЕРТ ТОГЛОНО
Монголын нэрт зураач Б.Шаравын “Монголын нэг өдөр” бүтээлээс сэдэвлэн гадаадын зочид, жуулчдад зориулан бүтээгдсэн, Монгол ахуй, ёс уламжлалыг уран сайхны хэлбэрээр үзүүлэхэд чиглэгдсэн зохиомжтой бэсрэг хөгжимт жүжгийн хэлбэрийг агуулсан тоглолт аж.
Тоглолтонд нийслэлийн “Улаанбаатар театр”-ын 60 мэргэжлийн уран бүтээлч буюу “Хангарьд” үндэсний найрал хөгжим 30 хүний бүрэлдэхүүнтэйгээр Улаанбаатар театрын ерөнхий удирдаач Б.Эрхэмбаярын удирдлага дор оролцохын зэрэгцээ Улаанбаатар театрын 14 бүжигчин Д.Баяртын удирдлага дор, мөн дуу ангийн 16 дуучин Д.Түвшинцогтын удирдлага дор оролцоно.
ЧОЙЖИН ЛАМЫН СҮМ МУЗЕЙД “БУРХДЫН ЧУУЛГАН” ҮЗЭСГЭЛЭНГ ТОЛИЛУУЛНА
Бурхны шашны хамгаалагч сахиус арван догшдын хөргөөр чимсэн өргөөний өмнө Жахар цам гардаг. Жахар цамд зориулж тусгайлан бүтээсэн уран нарийн хийцтэй маш ховор сахиус догшдын өмсгөл зүүсгэл, танка зураг, зээгт наамал зэрэг 100 шахам үзмэрийг дэлгэн үзүүлж байна. Мөн тус үзэсгэлэнгээс Тахилын цам буюу бага цамд гардаг Өндөр гэгээний өөрийн мутрын хийцийн 21 дара эхийг үзэх боломжтой аж.
Үзэсгэлэн энэ сарын 7-17-ны өдрүүдэд олон нийтэд нээлттэй байна.
ЗУУНЫ МАНЛАЙ УРТЫН ДУУЧИН Н.НОРОВБАНЗАДЫН НЭРЭМЖИТ ДУУЧДЫН “ЭГШИГЛЭНТ МОНГОЛ” ДУУНЫ ШИНЭ УРАН БҮТЭЭЛИЙН ТОГЛОЛТ БОЛНО
Эгшиглэнт Монгол тоглолтын хөтөлбөрт XVI-XX зууны үед зохиогдсон Монголын олон үндэстэн болон төрөлх Монгол нутгаасаа хувь заяаны эрхээр тархан суурьшсан бусад Монгол үндэстэн, овог аймгуудын мартагдсан болон бага дуулагдсан дуунуудаас бүрдэж байгаа аж. Тоглолтод,
• ХБ, АЖ, ТШ, Зууны манлай уртын дуучин Н.Норовбанзадын нэрэмжит дуучид
• Монгол Төрийн Үндэсний Хөгжмийн Их Найрал бүрэн бүрэлдхүүнээрээ оролцоно. Тоглолт энэ сарын 10-ны өдөр буюу нэг өдөр тоглох юм байна.
ЭНЭ САРЫН 31-НЫГ ДУУСТАЛ “LAND OF THE SKY” ҮНДЭСНИЙ УРЛАГИЙН ТОГЛОЛТ ҮРГЭЛЖИЛНЭ
Монгол Улсын Үндэсний Урлагийн Их Театр нь 74 жилийн арвин их түүхтэй, үндэсний урлагийг түгээн дэлгэрүүлэгч, мэргэжлийн өндөр ур чадвар бүхий 150 гаруй уран бүтээлчидтэй мэргэжлийн урлагийн хамгийн том байгууллага юм.
Бидний жил бүр уламжлал болгон зохион байгуулдаг жуулчдад зориулсан тоглолт шинэчлэгдэн “Land of the Sky” нэртэйгээр тоглож буй нь энэ аж.
Тоглолтын хөтөлбөрт үндэсний урлагийн бүхий л төрөл багтсан бөгөөд Монгол орны 4 зүгт амьдарч буй нүүдэлчин ард түмний өвөрмөц соёлыг харуулах зорилготой. Уран бүтээлчид,
- Монгол Төрийн Үндэсний Хөгжмийн Их найрал
- АЖ, ТШ Зууны манлай бүжиг дэглээч Ц.Сэвжидийн нэрэмжит бүжгийн чуулга
- АЖ, ХБ, ТШ Зууны манлай уртын дуучин Н.Норовбанзадын нэрэмжит дуучид
ҮНДЭСНИЙ УРЛАГИЙН ИХ ТЕАТРТ “МОНГОЛ БҮЖГИЙН ГАЙХАМШИГ” КОНЦЕРТ ТОГЛОНО
Үндэсний урлагийн их театрын “Land of the Sky” цуврал тоглолтын хүрээнд АЖ, ТШ, Зууны манлай бүжиг дэглээч Ц.Сэвжидийн нэрэмжит бүжгийн чуулгын үндэсний их баяр наадамд зориулсан “Монгол Бүжгийн Гайхамшиг” тоглолт болно. Тоглолт энэ сарын 12-ны өдөр Үндэсний урлагийн их театрт 20 цагаас ганцхан удаа тоглоно.
МОНГОЛЫН УРАН ЗУРГИЙН ГАЛЕРЕЙД “НҮҮДЭЛ” УРАН ЗУРГИЙН ҮЗЭСГЭЛЭН, “МОНГОЛ БАХАРХАЛ” ГЭРЭЛ ЗУРГИЙН ҮЗЭСГЭЛЭНГ НЭЭЛЭЭ
Монголын уран зургийн галерейн алтан сан хөмрөгт Монголын дүрслэх урлагийн нэрт төлөөлөгчдийн 4000 гаруй бүтээл хадгалагдаж байдгаас энэ удаа “Нүүдэл” тусгай үзэсгэлэнд нүүдэлчдийн ахуй амьдрал, соёл уламжлал, зан заншлыг харуулсан уран зураг, баримал, зураасан зураг, инстоляц болон нэн орчин үеийн нийт 70 гаруй бүтээлүүдийг сорчлон дэлгэлээ. Мөн Монголын гэрэл зурагчдын нэгдсэн холбоотой хамтарсан “Монгол бахархал” гэрэл зургийн үзэсгэлэнд Монгол туургатан түмний үндэсний уламжлалт сууц болох Монгол гэрийн өв соёл, орчин цагийн хөгжил, эдлэл хэрэгцээ зэргийг харуулан сэдэвчилсэн 40 гаруй гэрэл зургийг толилуулж байгаа аж. Үзэсгэлэн энэ сарын 15-ны өдрийг дуустал үргэлжилнэ.
“ХУУР МАГНАЙ” ЧУУЛГА НЬ “МОНГОЛЫН ГАЙХАМШИГТ” ТОГЛОЛТОО ТОЛИЛУУЛНА
Ардын урлагийн “Хуур Магнай” чуулга нь Монголынхоо гайхамшигт үндэсний язгуур урлаг болох Монгол ардын уртын дуу, ардын дуу, морин хуурын татлага, хөөмэй, ардын хөгжмийн цөөхүүл, язгуур бий биелгээ, бөөгийн бүжиг, цамын бүжиг, уран нугаралт, магтаалаас бүрдэн цогц үзүүлбэрүүдээрээ онцлогтой.
Тэд энэ сарын 15-ныг МҮЭСТО-нд “Монголын гайхамшигт” урлагийн тоглолтоо үзүүлэх юм.
