АПУ ХК-ийн урилгаар сонгодог урлагийн “домог” алдарт Placido Domingo Монгол Улсад анх удаа хүрэлцэн ирлээ.
Монгол Улсын аж үйлдвэрийн салбарын ууган үйлдвэрлэгч АПУ компани 100 жилийн ойн хүрээнд дэлхийн сонгодог урлагийн оддын тоглолтыг наймдугаар сарын 3-ны 16:00 цагаас Улсын Дуурь Бүжгийн Эрдмийн Театраас Д.Сүхбаатарын талбайд олон нийтэд зориулж шууд дамжуулан хүргэнэ.
Дэлхийн сонгодог урлагийн домог, алдарт гурван тенорын нэг Пласидо Доминго, Монгол Улсын Ардын Жүжигчин Э.Амартүвшин тэргүүтэй дэлхийн шилдгүүд Монголд анх удаа дуулах гэж байна.
Монгол Улсын аж үйлдвэрийн салбарын ууган үйлдвэрлэгч АПУ компани 100 жилийн ойн хүрээнд дэлхийн сонгодог урлагийн оддын тоглолтыг наймдугаар сарын 3-ны 16:00 цагт Улсын Дуурь Бүжгийн Эрдмийн Театрт тоглох ба концертыг Д.Сүхбаатарын талбайд олон нийтэд зориулан шууд дамжуулан хүргэхээр бэлтгэж байна.
Дэлхийн алдарт гурван тенорын нэг, дуурийн дуучин, удирдаач, тенор, баритон, 150 гаруй дүр бүтээсэн эклектик уран бүтээлч, Грэммигийн 12 шагналын эзэн Пласидо Доминго болон энэ цаг үеийн алдарт баритон, дэлхийн бүхий л гол тайзнаа гайхамшигт хоолойгоороо эх орныхоо нэр хүндийг өндөрт өргөж яваа Монгол Улсын Ардын жүжигчин Э.Амартүвшин, олон улсад нэр хүнд нь тасралтгүй өсөж буй гайхалтай сопрано Нина Минасян, орчин цаг үеийн хамгийн агуу тенор дуучдын нэг алдарт Ла Скала театрын дуучин Фабио Сартори, дэлхийд тэргүүлэх залуу удирдаачдын нэг Гаэтано Ло Коко нарыг эх орондоо урьж, “Centennial Celebration” дуурийн сонгодог тоглолтыг зохион байгуулах гэж байна.
Дэлхийд төдийгүй Монголын сонгодог урлагийн түүхэнд бичигдэх дэлхийн шилдгүүдийн ховорхон хослолыг энэхүү тоглолтоор хүргэх бөгөөд алдарт дуурийн дуучин Пласидо Доминго “Nemico della Patria”, “Perfidi! … Pietà, rispetto, amore” зэрэг уран бүтээлээ Монголын тайзнаа амилуулах бол Монгол Улсын Ардын жүжигчин Э.Амартүвшин “Bizet Toreador, Carmen”, “No vecchio t’inganni… Sì, vendetta, Rigoletto” зэрэг уран бүтээлийг зориулах юм байна.
Мөн урьд өмнө нь тайзнаа тоглогдож байгаагүй хосолсон уран бүтээлийг дэлхийн шилдэг дуурийн дуучид хамтран толилуулахаар боллоо.
Тоглолтын талаар алдарт дуучин Пласидо Доминго, Дуурийн урлагт хүчин зүтгэсэн 65 жилийн хугацаанд анх удаа Монголд тоглох гэж буй тул урилгыг хүндэтгэн хүлээж авсан. Ялангуяа тэртээ 2012 онд Пласидо Домингогийн нэрэмжит олон улсын дуурийн дуучдын уралдаанд тэргүүн байр эзэлж байсан Э.Амартүвшин дуучин маань ер бусын онцгой авьяастай уран бүтээлч төдийгүй түүний хоолойн техник, ур чадварыг нэгэн тайзнаа мэдэрнэ гэдэгтээ туйлын их баяртай байна гэжээ.
Монгол Улсын Ардын жүжигчин Э.Амартүвшин, Амьд домог Пласидо Домингог эх орондоо авчрах мөрөөдөл минь биелж байна. Түүнийг Монгол үндэсний урлаг соёл, үзэсгэлэнт эх орныг минь мэдрээсэй гэж хүсэж байна гэжээ.
