Ням гарагт Парисын олимпын эрэгтэйчүүдийн 100 метрийн зайн уралдаанд АНУ-ын тамирчин, дэлхийн аварга Ноа Лайлз түрүүлж, алтан медаль зүүлээ.
Ингэхдээ тэр орчин үеийн түүхэнд арын өрсөлдөгчөөсөө хамгийн богино хугацаагаар түрүүлсэн тамирчин болсон байна.
Лайлз болон Ямайкын тамирчин Кишане Томпсон нар ижил 9.79 секундийн хугацаанд барианд орсон юм. Гэхдээ Лайлзыг секундийг 5,000 хуваасны нэгтэй тэнцүү хугацаагаар түрүүлж барианд орсон гэж тооцжээ.
2004 онд Афины наадмын аварга Жастин Гэтлинээс хойш 100 метрийн зайд түрүүлсэн анхны Америк тамирчин Лайлз болсон байна.
“Энэ бол миний хүсэж байсан зүйл. Гайхалтай өрсөлдөгчид, маш хэцүү тулаан байлаа. Бүгд эрүүл саруул, бүгд тулаанд бэлтгэгдэж ирсэн. Би тэдний нэг болохоо батлахыг хүссэн. Би чонуудын дундах нэг чоно байлаа” гэж Лайлз уралдааны дараа ярьжээ.
Лайлз түрүүлснийг батлахын тулд “photo-finish” гэгддэг аргаар тамирчид барианд орох үеийн дүрс бичлэгийг нарийвчлан шинжилсэн юм.
Энэ уралдаанд оролцсон тамирчид ерөнхийдөө тун ойрхон барианд орсон байна.
АНУ-ын бас нэг тамирчин Фрэд Кэрли 9.81 секундээр хүрэл медаль зүүхдээ зууны нэг секундээр Өмнөд Африкийн Акани Симбинегээс түрүүлсэн юм.
Олимпын аварга цолоо хамгаалж уралдсан Италийн Марсел Жэкобс 9.85 секундээр тавдугаар байрт оржээ.
Түүний араас Ботсванын Лэцил Тебого 9.86 секунд, АНУ-ын Кэнни Бэднарек 9.88 секунд, Ямайкын Облике Севил 9.91 секундээр удаалцгаасан байна.
Уралдааны дараа Лайлзаас 200 метрийн зайд ижил амжилт үзүүлж чадах эсэхийг нь асуухад “100 хувь. Энэ бол миний хамгийн сайн байгаа тэмцээн. Би 100 метрийн зайд хувийн дээд амжилтаа тогтоолоо. 200 метрт ч бас ингэхэд бэлэн байна” гэж хариулжээ.
Гурван удаагийн дэлхийн аварга тэрбээр гурван жилийн өмнө Токиогийн олимпын 200 метрийн зайд хүрэл медаль хүртэж байсан юм.
Эх сурвалж: AFP
