Чөлөөт бөхийн олимпын бус жингийн дэлхийн аварга шалгаруулах тэмцээн Албанийн нийслэл Тирана хотод үргэлжилж байна.
Өнгөрсөн шөнө эмэгтэй дөрвөн жингийн финалын барилдаанууд болсноос Монголын шигшээ багийн тамирчин Сүхээгийн Цэрэнчимэд -59 кг жинд мөнгөн медаль хүртлээ.
Урьдчилсан шатанд Мексикийн Алехандра Ривера Арригаг 10-0 харьцаагаар ялсан тэрээр шигшээ 16-д Канадын Лоренс Бьюрегардтай 8-8 харьцаагаар тэнцэн бүхэл онооны илүүгээр ялсан.
_df._Mansi_Mansi_(IND)_20487-X3-073341-2146474361.jpeg)
Улмаар шөвгийн наймд Азербайжаны Алёна Колесникийг 9-0, хагас шигшээд Энэтхэгийн Манси Мансиг 4-1 харьцаагаар тус тус ялж финалд шалгарсан юм. Харин финалд Японы Рисако Кинжод 4-2 харьцаагаар ялагдан мөнгөн медаль авлаа.
Мөн өчигдөр эмэгтэй -65 кг жинд Түвшинжаргалын Энхжин дагах барилдаан хийж Францын Кендра Августин Жоселин Дахерыг 8-7 харьцаагаар ялсан ч Энэтхэгийн Манишад 7-2 харьцаагаар ялагдан тэмцээнээ дуусгасан.
Харин -72 кг жинд Зоригтын Болортунгалаг хүрэл медалийн төлөө Чехийн Адела Ханзликовад 2-0 харьцаагаар ялагдсанаар 5-р байр эзэлсэн юм.
Залуучуудын ДАШТ-ээс хүрэл медаль аваад байсан Чинболдын Отгонтуяа -55 кг жинд барилдсан ч шигшээ 16 шатанд Украины Олександра Хоменецэд 4-3 харьцаагаар ялагдсан тэмцээнээ өндөрлөсөн байна.
