2012 онд хүн худалдаалах гэмт хэргийн хохирогч болсон Н-ийг 12 жилийн дараа эх орондоо авчрах ажиллагааг Монгол Улсын Цагдаагийн байгууллагаас Интерполын шугамаар амжилттай зохион байгуулжээ.
Хохирогч Н, 2012 онд би 16 нас хүрч анхны паспортаа авсан. Тэгсэн хотоос нэг эмэгтэй ирээд манай аав, ээжид “би танай охиныг Улаанбаатарт аваачиж, ажил хийлгэж, сайн амьдруулж мөнгөтэй болгоно” гэж хэлсэн. Улаанбаатарт ирсний дараа надад гадаад паспорт гаргуулсан. Дараа нь Эрээн рүү явж, бараа татаж ирнэ гэж намайг дагуулж явсан. Вагонд суухад бүгд гадаад хүмүүс, би хэлийг нь ойлгохгүй. Нөгөө эмэгтэйдээ “Та юу хийж байна аа?” гэхэд “Чи яваандаа ойлгоно оо” гэсэн.
Очоод гурав хоносны дараа “Бид хэзээ буцах вэ?” гэхэд “Хэд хоноод буцна аа” гэж байсаар байгаад намайг орхиод Монгол руу буцсан. Яваад ирэхдээ дахин нэг хүүхнийг ажил төрөл хийлгэнэ гэж хуурч авчирсан. Хэлийг нь ойлгохгүй. 4-ийн тооны ард дөрвөн тэг, ийм мөнгөөр намайг зарсан байна.
Хүнд зарагдаж, хохирч байгаагаа ерөөсөө мэдээгүй. Тэр хүн энэ тухай юу ч яриагүй. Тэр хүмүүс хоорондоо юу ярьж байгааг би мэдэхгүй, би зугтаах учраа ч олохгүй. Баруун, зүүн зүгээ ч мэдэхгүй.
-12 жилийн дараа гэртээ ирэхэд ямар байв?
-12 жилийн дараа ээж минь хөгширсөн байна. Аав минь бурхан болсон байна. Бичиг баримтгүй учир надад буцах боломж байсангүй.
-Яаж цагдаагийн байгууллагад мэдэгдэж, тусламж авсан бэ?
-Би Өвөрмонголын Шилийн гол аймгийн хүнтэй холбогдож, “Би ийм хүнд зарагдсан юм, бичиг баримт байхгүй. Яах вэ, туслаач” гэж 2024 оны тавдугаар сард хандсан.
Тэр үеэс хойш хоёр улсын цагдаагийн байгууллагуудын тусламжаар 11-р сард Монголдоо ирлээ. Намайг эх оронд минь авчирсанд баярлалаа гэв.
Монгол болон БНХАУ-ын Цагдаагийн байгууллага, Интерполын үндэсний төвтэй хамтран хохирогч бүсгүй Монголдоо авчирчээ. Буруутай этгээд нь Хятад улсад байгаа бөгөөд шүүх хурал удахгүй болох юм байна.
