Олон улсын эрх зүйн хөгжлийн байгууллага (IDLO)-аас Шүүхийн ерөнхий зөвлөлтэй хамтран “Шүүх эрх мэдлийн байгууллагын хамтын ажиллагаа ба ил тод байдал” төслийг Европын Холбооны санхүүжилтээр хэрэгжүүлэхээр болжээ.
Европын холбоо шударга ёс, шүүх эрх мэдлийн систем хүчтэй, ойлгомжтой байх нь ардчилалд чухал үнэ цэнтэй гэж үздэг. Тиймээс Монгол Улсын шүүх эрх мэдлийн байгууллагатай хамтран ажиллаж шүүхийн шинэчлэлтийн чиглэлд үр дүнтэй ажиллаж байгаа.
Энэ удаад эхлүүлж буй “Шүүх эрх мэдлийн байгууллагын хамтын ажиллагаа ба ил тод байдал” төслийн үр дүнг шүүхийн үйлчилгээг ашиглаж буй хэрэглэгч бүгд хүртэнэ. Өөрөөр хэлбэл, төслийн хүрээнд Монголын шүүхийн үйл ажиллагаа илүү хүртээмжтэй, ойлгомжтой болж, Монгол Улсын нийт иргэдийн шүүхэд итгэх итгэл нэмэгдэнэ гэсэн хүлээлттэй буйгаа Европын холбооноос Монгол Улсад суугаа Элчин сайд Ина Марчюлёните нээлтийн үеэр онцоллоо.
Харин Олон улсын хөгжлийн эрхзүйн байгууллагын Суурин төлөөлөгч Чарльз Болланд “Энэхүү төслөөр дамжуулан Монгол Улсын хэвлэл мэдээлэл, иргэний нийгмийн байгууллага, шүүх эрх мэдлийн байгууллагын хамтын ажиллагааг бэхжүүлж, чадавхжуулах юм. Ингэснээр шүүхийн ил тод байдал, мэдээллийн хүртээмж сайжирна. Улмаар шүүх эрх мэдлийн байгууллага бүхий л талын хамтын ажиллагааг өндөр түвшинд авч үздэг болоход төслийн зорилго орших юм. Үр дүнд нь Монгол Улсын иргэд тодорхой, үнэн зөв мэдээлэл хүлээн авдаг болох юм” гэлээ.
Төслийг хэрэгжүүлснээр шүүх эрх мэдлийн байгууллага, иргэний нийгэм, хэвлэл мэдээллийн байгууллага хоорондын харилцаа, хамтын ажиллагааг бэхжүүлж, сэтгүүлч, хэвлэл мэдээллийн байгууллагуудыг шүүхийн сэтгүүл зүй болон тайлбарлах сэтгүүл зүйн аргад суралцуулах, шүүхийн шийдвэрийн тойм, мэдээ бэлтгэх чиглэлээр чадавхжуулж, цаашлаад шүүхэд итгэх иргэдийн итгэлийг нэмэгдүүлэх аж.
Төслийн нээлтийн үеэр Шүүхийн Ерөнхий зөвлөл, Шүүхийн сахилгын хороо, Шүүхийн академи, Монголын хуульчдын холбооны төлөөллүүд хамтран ажиллах санамж бичигт гарын үсэг зурлаа.
