Түгжрэл, түгжрэл… түүнд зарцуулсан мөнгө л хайран юм.
Түүнээс манай дарга нар түгжрэлийг бууруулчихмаар олигтой ганц ч ажил хийсэнгүй. Явж явж Улсын Баатарын санаачилсан дугаарын хязгаарлалт гэгч л амь аргацааж байх шив. Бусдаар бол мөнгө л үрэгдсээр байгаагаас биш шийдэл гарсан ажил үнэндээ алга аа.
Ер нь энэ хотын төв рүү машин унаж очоод байгаа төрийн албан хаагчдыг автобусаар зөөдөг болчихьё гэдэг санал гараад ажил хэрэг болж чадахгүй явсаар саяхан зөвхөн төрийн ордон руу явдаг нийтийн тээврийн чиглэл гаргаж нэг үзээд даанч нөгөө автобуснууд нь ихэнхдээ хоосон давхисаар алдагдалд орж арга буюу энэ чиглэлийг татан буулгасан байдаг. Гэтэл түгжрэлийг сайд Р.Эрдэнэбүрэн “Төрийн ордныхныг тусгай автобусаар үйлчлүүлэх саналыг дахин тавина” гэж мэдэгдлээ.
Үүнийгээ тайлбарлахдаа “… өглөө бүр 1000 суудлын тэрэг Төрийн ордныг чиглэдэг бол мөн оройдоо энэ тооны автомашин тус ордноос гардаг. Нэгдсэн зохион байгуулалттайгаар автобусаар үйлчлүүлдэг болчихвол түгжрэл бууруулахад нэмэртэй.
Тиймээс Засгийн газрын хуралдаан руу дээрх саналаа удахгүй дахин оруулна. УИХ-аас гадна яам, агентлагт ажилладаг сайд дарга нарыг ажилтан, албан хаагчдынхаа хамтаар автобусаар үйлчлүүлэх уриалгыг гаргана…” гэжээ.
Уг нь санаа нь зөв. Гэвч байгаа оносонгүй.
Өнөөдөр хотын зам дээр автобустай ч түгжирнэ. Машинтай ч түгжирнэ. Ер нь огт ялгаа байхгүй. Ийм байхад автобус ажлын гадаа очно уу, арын хашаанд зогсоно уу ялгаагүй юм. Ер нь манай хотын нийтийн тээвэр бусад улсуудынх шиг саадгүй сүнгэнэдэг болчихвол төрийн ордныхон заавал хашаандаа буух гэхгүй арын МУИС, урд Сүхийн талбай дээр буугаад жирийлгэчихнэ асуудалгүй. Даанч автобус нь зам дээр таг зогсчихдог учраас мянга уриалга гаргаад хэрэгжилт нь өмнөхтэйгээ л адид үр дүн үзүүлнэ.
Тэгэхээр төрийн албаныхныг автобусанд чихмээр байвал нийтийн тээвэртээ нэгдүгээр эгнээг чөлөөлж өг. Үүнийг цаасан дээр бичсэн бичвэр бус албажуул. Магадгүй үүний дараа автобус асуудалгүй сүнгэнэдэг болчихсны дараа “төрийн албаныхаан! та нар одоо автобусанд суу” гэж захиргаадаж болох юм. Гэвч тэр болтол зай ч байна, лай ч байна даа…
Ер нь юм хийгээд байгаа юм шиг дүр үзүүлж ажилладгаа л больмоор. “Түгжрэл хариуцсан сайд аа та ажлаа хийнэ үү” гэхээр “би “20 минутын хот” үндэсний хорооны дарга” гэж мэлздэг, эсвэл “төрийн ордныхныг дахин автобусаар зөөнө” гэх судалгаа шийдэл багатай юм ярьж оромдсоор… цаг явсаар… мөнгө бас урссаар…
ШАРХҮҮ
