Гэр бүл, хөдөлмөр, нийгмийн хамгааллын сайд Л.Энх-Амгалан Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төслийг УИХ-ын дарга Д.Амарбаясгаланд өргөн барьсан.
Гэвч энэ хуулийн зүйл, заалтыг Ардчилсан намын гишүүд санаатайгаар мушгин гуйвуулж байгаа тухай Л.Энх-Амгалан сайд мэдээлэв.
Тэрбээр “Санаатайгаар хэд хэдэн хүн гуйвуулж байна. УИХ-ын гишүүн Л.Мөнхбаясгалан. өчигдөр П.Сайнзоригийн хуулиас илүү хортой хууль үлдчихсэн байна гэж мэдээлэл хийсэн. Бид квот хөндөөгүй, 288 мянган хятад хүн оруулж ирнэ гэсэн заалт энэ хуулийн төсөлд байхгүй. Ямар учраас ингэж мушгиад байна вэ.
Сүүлийн үед Засгийн газрын гишүүн, Аялал жуулчлалын сайд асан Ц.Оюунгэрэл сайд байхдаа гаднынхныг их оруулж ирье гэж ярьдаг байсан. Би андуураагүй бол гадаад нөхөртэй. Гадаад нөхөр нь Монголын иргэншил авчхаагүй бол энэ хүн жил бүр визийн асуудал ярьж байгаа. Визийн асуудлыг шийдэхэд хүнд суртал байна, үүнийг арилгая гэж байхад энэ хүн юунд эсэргүүцээд байна вэ. Сүүлийн үед гадаад нөхөртэй бүсгүйчүүд яагаад Монголын тусгаар тогтнолд санаа зовох болов? Хэн нь хэрсүү байхаа харъя. Сэрэмжтэй байя. Би Ц.Оюунгэрэл, Л.Мөнхбаясгалан нарыг телевизийн нэвтрүүлэгт урьж байна, мэтгэлцье” гэв.
Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төсөлд хөдөлмөрийн зах зээлд дотоодын ажиллах хүчний хомсдол бодитоор тулгарч, жилд дунджаар 30-40 мянган ажлын байр ажиллах хүчний дутагдалтай байгаа. Засгийн газрын 2024-2028 оны үйл ажиллагааны хөтөлбөрт туссан 14 мега төслийг хэрэгжүүлэхэд 280 мянган ажлын байрны хэрэгцээ бий.
Дотоодын ажиллах хүчний хомсдолыг нөхөх, хөрөнгө оруулалт, бизнес эрхлэлтийг нэмэгдүүлэхийн тулд уян хатан бодлого баримталж буйг онцлов. Ингэхдээ эдийн засгийн өндөр бүтээмж бүхий уул уурхай, олборлолт, мэдээлэл холбоо, банк санхүү зэрэг салбаруудад гадаад ажилтны тоо, хувь хэмжээг хязгаартай тогтоох, дотоодын ажиллах хүчнийг эдгээр салбаруудад түлхүү ажиллуулах бодлогыг дэмжих тухай тусгажээ.
