Эхлээд оффшорыг хориглосон хуультай болъё, дараа нь цээрлүүлье

\”Оффшор… оффшор…” гээд бүгд хашигчиж байна. Яг үнэндээ оффшор гэж юу юм
бэ. Мангас уу, эсвэл манай улсад байхгүй бизнесийн, мөнгөн хадгаламжийн таатай
нөхцөл үү. Үүнийг л нэгдүгээр ойлгочихмоор юм шиг байгаа юм.

Үүний дараа тэдгээр оффшорчид гээд байгаа хүмүүс яагаад мөнгөө гадаадад тэр
дундаа оффшор бүсэд байршуулахыг хүссэн бэ гэдгийг тодруулчихмаар. Ингэснээр Монгол
Улсад бизнес эрхлэхэд ямар орчин нөхцөл байгааг ойлгож болох биз. Харин одоо
хууль санаачилж, оффшорчидтой хуулийн хүрээнд тэмцэж болохоор болж байна.
Түүнээс нэг нөхөр гарч ирээд улсын төсвийн мөнгийг Панамийн арлууд дахь оффшор
бүсэд аваачаад байршуулчихсан юм шиг ойлгож болохгүй л дээ. Бүгд л аливаа
бизнес, үйл ажиллагаа эрхэлж, олсон ашгаасаа бага татвар төлөхийг л хүссэн
хэрэг биз.

 

Тэгвэл хаанаас хэрхэн ашиг олсон бэ гэдгийг мэдээж тогтоох шаардлага гарч
ирж байна. Монголд үйл ажиллагаа явуулж олсон ашгаа гадны оффшор бүсэд
байршуулж байгаа бол энэ нь татварын тухай хуулийг ноцтойгоор зөрчсөн хэрэг
болно биз дээ. Цаашлаад ах дүү, хамаатан садан, найз нөхөд нь энэ хөрөнгөөс
хувь хүртсэн бол татагдаад л явах нь ойлгомжтой. Гэтэл манайд оффшор данстай
хүнтэй хариуцлага тооцдог ямар ч хууль, тогтоомж алга. Дэмий л \”оффшорчдыг
залхаан цээрлүүлье” нэртэй хөдөлгөөнүүд өрнөсөөр байна.

 

Уг нь аль оффшор бүсийн ямар банканд манай улсын хэчнээн хүн хэр хэмжээний
хөрөнгөө хадгалуулсаныг эхлээд тогтоож, тодорхой тоо баримттай болчихмоор
байгаа юм. Үүний дараа \”чи оффшор данстай биз дээ” гэж баримттайгаар ярьж
болно. Түүнээс одоо хэн нь хаана ямар данс эзэмшээд байгаа нь мэдэгдэхгүй, үнэн
худал, цаанаа улс төрийн зорилготой мэдээллүүд цацагдаад байна.

 

Хүн өөрийн шударгаар олж авсан хөрөнгөөс аль болох бага татвар төлөөд
хадгалахыг хүснэ биз дээ. Би лав цалингаасаа 10 хувийн татвар төлөхийг хүсэхгүй
л байна. Тэгээд ч насны бөгсөнд түүнийхээ үр шимийг хүртэж амжихгүй өөд болж,
өнөөх нь миний үр хүүхдэд ч хүртсэн юмгүй төрийнхний халаасаар дамжаад дуусвал
яах уу. Үүний оронд өөрөө үгүй болсон ч үр хүүхэд нь аваад идчихээр тийм л
хадгаламжийг бий болгох нь чухал ч юм уу гэж бодогдох боллоо. Гэхдээ үүгээрээ
оффшорчдыг өмгөөлсөн зүйл байхгүй. Харин Монголын хууль тогтоомжид л алдаа
дутагдал маш их байна. Олсон орлогоо гадаадад аваачаад нуух боломжийг манай
хууль л олгосон. Тэгээд \”та оффшор данстай байж болохгүй” гэж хуульчлаагүй
хэрнээ гэм буруутан болно гэдэг утгагүй зүйл. Хуультай, тогтоолтой бол олсон
орлогоо нуун далдсан этгээдэд хариуцлага тооцоход тун хялбар болно доо.

За ингээд хуулийн дагуу шалтгаад эхлэхээр нөгөө нуусан хөрөнгийнх нь эх үүсвэр
нь тодорхой болж, Оюутолгойг худалдсан уу, Эрдэнэтийг барьцаалсан уу гэдэг нь илэрч эхэлнэ биз дээ. Харин одоо ёстой
жинхэнээсээ \”ийм луйварчдыг орогнуулсан парламентыг огцруулья” гээд хашгичиж
болохоор болж байна. Түүнээс одоо бол нохойнд барьдаг мод гэгчээр улс төрчдийн
тулааны гар хөл болсоор л таарч байх шиг…

Үндэстэн агентлаг