Монгол Улсын “Үйлчилгээний Гавьяат Ажилтан” ОСНАА-н Ганбиж ХХК-ий үүсгэн байгуулагч Сүмбээ овогтой Сүхээ нь 2025 оны 01-р сарын 25-ны өдөр өвчний улмаас таалал төгсөж, гэр бүл, үр хүүхэд, төрөл төрөгсдөд нөхөж байршгүй хүнд гарз тохиолоо.
С.Сүхээ нь 1939 онд Увс аймгийн Сагил суманд төрсөн.
1939-1947 онд эцэг эхийн гар дээр хүмүүжиж байгаад 1947-1959 онд Увс аймгийн төвийн 10 жилийг дүүргээд 1959-1963 онд МУИС-ийн химич мэргэжлээр төгссөн.
1963-1968 онд ББМҮЯ-ны харьяа Барилгын эрдэм шинжилгээний институтэд лабораторийн эрхлэгч, 1968-1978 онд ББМҮЯ-ны харьяа Толгойтын нэгдсэн тоосгон заводод МАХН-ын хорооны дарга, 1983-1986 онд ОСНААУГ-ын ОСА-н 6, 7-р конторын дарга, 1983-1986 онд ОСНААУГ-ын боловсон хүчин, НААҮЯ-нд 1986-1989 онд боловсон хүчний ахлах мэргэжилтэн, 1989-1991 онд Улаанбаатар хотын Халуун усны захиргааны дарга, 1991-2001 онд ОСА-н 5-р конторт боловсон хүчин, ОСА-н 1-р конторт даргаар ажиллаж байгаад 2001 онд хувийн анхны ОСНАА-н Ганбиж ХХК-ийг үүсгэн байгуулж, ерөнхий захирал, зөвлөхөөр ажиллаж байв.
С.Сүхээ нь төр улсад 50 гаруй жил ажиллахдаа үйлдвэрлэл, үйлчилгээний үр ашгийг дээшлүүлэх, хөдөлмөр зохион байгуулалтыг боловсронгуй болгох, үйлчилгээнд соёлч боловсон байдлыг нэвтрүүлэх, хөдөлмөрийн хамт олныг бий болгох, ялангуяа ОСНАА-н салбарт анхны хувийн хэвшлийг санаачилан ажлын байр бий болгосон нь үнэлж баршгүй гавьяатай хүн билээ. Мөн орон сууцны ашиглалт, үйлчилгээ, орчны тохижилт болон ариун цэврийг сайжруулах, иргэд оршин суугчдын тав тухтай амьдрах нөхцлийг бий болгоход өөрийн хувь нэмрээ оруулж, онцгой гавьяа байгуулсныг үнэлэн төр засгаас Ардын хувьсгалын 50,60,70,80,90 жилийн ойн медаль, 1974 онд Засгийн газрын хүндэт “Жуух бичиг”, 1976 онд “Хөдөлмөрийн хүндэт” медаль, 1989 онд Биеийн тамир, спорт, Залуу үеийг халамжлан хүмүүжүүлэх ажилтан, 1991 онд Барилга НААҮ-ний “Тэргүүний ажилтан”, 1996 онд Монголын ахмадын холбооны гүйцэтгэх хорооны “Хүндэт тэмдэг”, 1999 онд “Алтан гадас” одон, 2000 онд МАХН-ын ахмад зүтгэлтэн, 2005 онд Увс аймгийн Сагил сумын хүндэт иргэн, 2006 онд Их Монгол Улс байгуулагдсаны 800 жилийн ойн хүндэт медаль, 2013 онд Улаанбаатар хотын хүндэт иргэн, 2016 онд “МУ-ын Үйлчилгээний Гавьяат Ажилтан”-аар тус тус шагнагдсан бахархан дуурайх үйлстэн байлаа.
Талийгаачийн үнэнч шударга, зарчимч, хөдөлмөрч, улс эх орондоо хийж бүтээсэн үйлс бүхэн нь бидний сэтгэлд үүрд мөнх хадгалагдан дурсагдаж, үлгэр дууриалал бий болсоор байх болно.
Үр хүүхэд, төрөл төрөгсдөд нь гүн эмгэнэл илэрхийлье.
УМ МА НИ БАД МЭ ХУМ
