🔹Монгол Улсын Шадар сайд, Шинэ хоршоо хөдөлгөөний салбар дундын уялдааг хангах Үндэсний хорооны дарга С.Амарсайхан Булган аймгийн Сэлэнгэ сумын 150 гаруй малчин хоршоологчидтой уулзаж, “Шинэ хоршоо” хөдөлгөөний хүрээнд хийгдэж буй зарим ажлын талаар танилцуулж, санал солилцлоо.
🔹“Шинэ хоршоо-Чинээлэг малчин” хөтөлбөрийн хүрээнд Булган аймгийн Сэлэнгэ суманд 23 шинэ хоршоо байгуулагдаж, 220 малчин хоршоонд гишүүнээр элсжээ. Мөн 56 малчин хоршоологч нийт 3 тэрбум төгрөгийн хөрөнгө оруулалтын зээлд хамрагджээ. Харин Булган аймгийн хэмжээнд 476 шинэ хоршоо байгуулагдаж, 438 малчин хоршоологч 56,1 тэрбум төгрөгийн хөрөнгө оруулалтын зээл авсан байна.
🔹Сэлэнгэ сумын малчин хоршоологчдын дийлэнх нь Үржлийн мал худалдан бойжуулах, борлуулах, Мах, сүү, цагаан идээ бэлтгэх, боловсруулах үйлдвэрлэл, цех байгуулах, өргөтгөх, тоног төхөөрөмжийн шинэчлэл хийх, Бүх төрлийн тэжээлийн ургамал тариалах, тэжээлийн үйлдвэрлэл, цех байгуулах, тоног төхөөрөмжийн шинэчлэл хийх зэрэг чиглэлийн хүрээнд үйл ажиллагаа эрхэлж байна.
🔹Уулзалтаар малчин хоршоологчид шинэ хоршоо хөдөлгөөн цаашид тогтвортой үргэлжлэх эсэх, нэг удаагийн олгох зээлийн хэмжээг нэмэгдүүлэх боломжийн талаар тодруулж байлаа.
Монгол Улсын Шадар сайд С.Амарсайхан “Монгол Улсын Засгийн газраас малчин өрхийн амьжиргааг нэмэгдүүлэх, бэлчээр, тэжээлийн нөөц хангамжийг нэмэгдүүлэхэд анхаарч “Шинэ хоршоо” хөдөлгөөнийг тогтвортой үргэлжлүүлнэ гэдгийг онцлоод ирэх таван жилийн хугацаанд 5 их наядын хөрөнгө оруулалт хийхээр төлөвлөсөн гэдгийг тодотгосон юм. Цаашлаад Шинэ хоршоо хөдөлгөөний хэрэгжилтийг харьяа нутаг дэвсгэртээ хангах хүрээнд орон нутгийн төсөв, холбогдох нэгж, салбарын бүтэц, орон тоонд зохион байгуулалт хийж хариуцсан бүтэц бий болгон ажиллах зэрэг олон зорилтыг 2025 онд хэрэгжүүлж буйгаа дуулгасан.
Мөн төр засгийн зүгээс аливаа бодлого шийдвэр, хөтөлбөрийг хэрэгжүүлэхдээ тухайн орон нутаг, бүсийн онцлогт тулгуурласан байхаар тооцож, Шинэ хоршоо хөдөлгөөний үйл ажиллагааг Монгол Улсын бүсчилсэн хөгжлийн бодлоготой уялдуулан эрчимжүүлнэ” хэмээн онцоллоо.
