УИХ-ын гишүүн Д.Цогтбаатар Хөгжлийн банкны хэрэгт холбогдож шүүхээс ял сонссон. Тэрээр Дээдийн шүүхийн тогтоолоо гардаж авсан гэсэн мэдээлэл гарсан. Үүнтэй холбогдуулан түүнийг УИХ-ын гишүүнээс нь эгүүлэн татах эсэхээр Ёс зүй, дэгийн байнгын хорооны дарга Б.Баярбаатар тайлбар өглөө.
Тэрээр “Дээд шүүхийн гаргасан шийдвэрийг УИХ хэлэлцэх эрх байхгүй. Хуулиар бидэнд ийм эрх олгогдоогүй. Өнөөдөр эрх зүйт төрийн гурван салбарын нэг нь шүүх засаглал. Шүүх засаглал нь өөрөө хараат бусаар ажиллах ёстой. Эрхзүйн гаргалгааны хувьд дээд шүүх шийдвэрийг албажуулж ирүүлэх үүргийг хүлээхгүй. Д.Цогтбаатар гишүүн тогтоолоо гардаж авсан гэдэг нь иргэн хүний асуудал.
Харин УИХ тэр шийдвэрийг хэрхэх эрх зүйн зохицуулалт байхгүй гэсэн үг. Ганцхан зохицуулалт байгаа нь бусад оролцогч дээд шүүхээс лавлагаа авах эрхтэй. Тэрийг нь ес хоногийн дотор гаргаж өгөх ёстой. Тэр агуулгаар хандвал УИХ-ын Тамгын газар лавлагааг авах магадлал нь өндөр. Нөгөө талаараа Үндсэн хуулийн 29 дүгээр зүйл дээр УИХ-ын гишүүн гэмт хэрэг үйлдсэн нь шүүхээр эцэслэн тогтоогдсон бол эргүүлэн татна гэсэн заалт байдаг.
Харин УИХ-ын тухай хуулийн 9.1.5 дээр УИХ-ын гишүүн нь гэмт хэрэг үйлдсэн нь шүүхээр эцэслэн тогтоогдсон бол Төрийн байгуулалтын байнгын хорооны хурлын дүгнэлтийг үндэслэн УИХ тогтоол батална, саналыг хураана гэсэн байдаг. Үндсэн хуулийн 29 дүгээр зүйл нь ерөнхий заасан бол УИХ-ын тухай хуулийн 9.1.5 дахь заалт нь нарийн өгсөн ч хоорондоо зөрчилтэй байгаа. Бид өнөөдөр УИХ-ын тухай хуулийн 9.1.5 дахь заалтыг барьж асуудлыг хэлэлцэх нь магадгүй Үндсэн хуулийн зөрчил рүү орох нөхцөл байдал харагдаж байгаа” гэлээ.
