УИХ-ын гишүүн Д.Цогтбаатарыг албан тушаалаа урвуулан ашиглаж, гэмт хэрэгт үйлдсэнд тооцон Анхан шатны шүүхээс нийтийн албанд томилогдох эрхийг хоёр жил хасаж, 20 сая төгрөгөөр торгох ял оноосон байдаг.
Давж заалдах шатанд ч ижил дүгнэсэн бөгөөд хяналтын шатаар хэрэг бүрэн шийдвэрлэгдээгүй тул УИХ-ын сонгуульд нэр дэвших боломжтой байжээ.
Харин УДШ хуралдаад, түүнийг гэм буруутайд тооцсон дээрх шийдвэрийг хууль ёсны, үндэслэлтэй гэж үзсэн байна.
Ийнхүү Д.Цогтбаатар нь “Мон дулаан”, “Газ импорт”, “Бэрэн” ХХК-д давуу байдал олгож, Эрүүгийн хуулийн 22.1-т заасан гэмт хэрэг үйлдсэнийг шүүх эцэслэн тогтоосон юм.
Гэвч тэрээр өнөө хэр нь албан үүргээ гүйцэтгэж байгаа. Энэ талаараа УИХ-ын гишүүн Д.Цогтбаатар “Иргэн Даваагийн Цогтбаатар, УИХ-ын гишүүн Даваагийн Цогтбаатар хоёр аль нь ч Үндсэн хууль зөрчөөгүй.
Хөгжлийн банкны хэрэгт холбогдуулаад ярихад, миний дээд албан тушаалтан байсан Я.Сод-Эрдэнэ гэдэг хүн яагаа ч үгүй байна. Г.Дөлгөөн гээд захирал бас яагаа ч үгүй. Дээд шүүхээр ороод, цагаадаад гарсан О.Батбаатар гэж захирал байгаа.
Миний дээр байсан албан тушаалтнуудад нөхцөл байдал өөрөөр, над дээр өөрөөр үйлчилсэн учир би гайхаж байгаа.
Тиймээс Улсын дээд шүүхээс ямар бичиг гарсан бэ гэдгийг очиж аваад шүүхийн шатанд дахин гомдол өгөхөөр материал бүрдүүлэн өмгөөлөгчийнхөө багт өгөх ёстой.
Тиймээс Улсын дээд шүүхийн шийдвэрийг очиж авсан юм.
Харин Улсын дээд шүүхийн шийдвэрийг очиж авснаараа ямар нэгэн байдлаар надад холбогдуулж байгаа гэмт хэргийг хүлээн зөвшөөрөх, эс зөвшөөрөх эрхзүйн байдалд ялгаатай ойлголт байхгүй.
Үндсэн хуульд УИХ-ын гишүүн гэж хэн бэ, хүний сонгох болон сонгогдох эрхийн талаар заасан өгсөн байгаа” гэлээ.
