УИХ-ын гишүүд ХХОАТ-ын 10 хувийг нэг хувь болгох иргэний санаачилга, 100 мянган иргэний саналыг дэмжиж хуулийн төсөл санаачлах асуудлаар мэдээлэл хийлээ.
УИХ-ын гишүүн Ж.Баярмаа:
-Хаврын чуулганаас олон нийтийн хүлээж байгаа хүлээлт их байна. Саяхан хүн амын орлогын албан татварын 10 хувь байдгийг нэг хувь болгож бууруулна уу гэх иргэний санаачилгыг D parlament-аар дамжуулан цахим гарын үсэг цуглуулахад долоо хоногийн хугацаанд 100 мянга гаруй хүн дэмжиж, саналаа өгсөн. тэгэхээр нэр бүхий УИХ-ын гишүүд олон нийтийн саналын дэмжээд, хуулийн төсөл санаачлахаар шийдвэрлэсэн. Энэ саналыг АН-ын бүлэг дэмжихээр болсон. Манай залуу үе татварын дарамтанд өртсөн байна. Мөн санал асуулгад оролцсон хүмүүсийн 65 мянга орчим нь Улаанбаатар хотоос санал өгсөн байна.
Нам болгон өөрсдийн мөрийн хөтөлбөртөө иргэдийн татварын дарамтаас салгана гэсэн байгаа. Засгийн газрын мөрийн хөтөлбөрт ч туссан заалт. Улсын төсвийн зарлага асар их нэмэгдэж байгаа. Сангийн яамнаас сүүлд авсан мэдээллээр, Нийгмийн даатгал төлдөг 787 мянган иргэний 50 хувь нь 2.2 сая төгрөгөөс доош цалин авч байна. 390 орчим мянган иргэн ийм цалин авч байна гэсэн үг. Иргэн хоёр сая төгрөг гар дээр авахын тулд нэрлэсэн цалин нь 2.5 сая төгрөг байх ёстой. Үүнийг олгохын тулд компаниуд 2.8 сая төгрөг зарцуулдаг. 2.5 сая төгрөгийн цалинтай хүн 200 гаруй мянган төгрөгийн татвар төлдөг. Татвар хураамжууд иргэдийн нуруунд маш их ачаалал болж байна. 2022-2023 оны хооронд Хүн амын орлогын албан татвар 44 хувиар нэмэгдсэн байна. Энэ жил өмнөх оныхоос 25 хувиар нэмэхээр төлөвлөсөн байна. Улсын төсвийн зардал жил болгон 30 орчим хувь нэмэгдэж байна. Одоо иргэдийнхээ нурууг хөнгөлөх хэрэгтэй гэж үзэж байна. Татвар төлөгчдийн ачааг хөнгөлж, төсвийг хэмнэж байж иргэдэд очих үр өгөөж нь гарна. Татвар бууруулснаар иргэдийн бодит орлого сайжирна, сүүдрийн эдийн засаг хумигдана. Хөдөлмөрийн идэвх сайжирна. Худалдаа, барааны эргэлт сайжирна гээд олон эерэг үр нөлөө бий болно. Иргэд хэмнэсэн мөнгөөрөө өөрсдөдөө хөрөнгө оруулалт хийх, хувьцаа авах нь зах зээлд ч эергээр нөлөөлнө.
УИХ-ын гишүүн Б.Пунсалмаа:
-Би татварын багц ажлын хэсгийн гишүүнээр ажиллаж байгаа. Би хувь хүнийхээ хувьд хүн амын орлогын албан татварыг нэг хувь болгохыг дэмжиж байна. Хувь хүмүүс, ААН-үүд ийм өндөр татвар төлж байгаа нь тэгш эрхтэй байхыг зөрчиж байна гэж үзэж байгаа. Хүн амын орлогын албан татвар бусад улсад өндөр байдаг. Тийм ч иргэд, ААН нь төлчихдөг. Учир нь буцаан олголтын хувь нь өндөр байдаг. Тодруулбал, барилга байгууламж барихад нь, хүүхдийнх нь сургалтын төлбөр төлөхөд нь, эмнэлгийн эмчилгээнд ороход нь буцааж өгдөг, үйлчилгээ үзүүлдэг. Манайд энэ тогтолцоо бүрдээгүй. Тиймээс бүгд тэгш дүнгээр төлөх санаачилгыг дэмжиж байгаа.
УИХ-ын гишүүн Г.Очирбат:
-Нэг сарын хугацаанд иргэдээс санал авсан бол 300-400 иргэн дэмжих байсан. Бид төрийн албан хаагчидаа цомхотгож цомхон болгох, төрийн үйлчилгээг цахимжуулах, орон тоог бууруулах байдлаар төсвөө хэмнэх боломжтой. 2024 оны сонгуульд намууд оролцохдоо цахим засаглалтай болно гэсэн. Үүнийгээ хэрэгжүүлэх шаардлагатай байна. Манайх 1000 хүнд ногдох төрийн албан хаагчдын тоогоороо хөрш орнуудаа тэргүүлж байнна.
Манайх 3.5 сая иргэнтэй, 225 мянган төрийн албан хаагчтай. Нэг хүнд ногдох төрийн албан хаагч 60 гаруй. Тийммээс цалим хэлбэрт шилжүүлэх хэрэгтэй байна.
