Ипотекийн зээлийн санхүүжилтийг арилжааны банкууд хувийн бизнестээ ашиглаж байна

Ипотекийн зээл олголт гацаанд орчихоод
байгаа. Үндсэндээ \”санхүүжилт байхгүй” гэдэг ганцхан шалтгаанаар арилжааны
банкууд иргэдэд төрөөс хэрэгжүүлж буй найман хувийн хүүтэй ипотекийн зээлийг
олгохоос татгалзсаар байгаа юм.

 

Тэгвэл Монголбанкнаас ипотекийн зээлтэй
холбоотой санхүүжилтийг сар бүр тогтвортойгоор олгож байгаа тухай өнөөдөр
мэдээллээ. Мөн арилжааны банкуудыг харилцагчаа хуурсан мэдээлэл өгөхгүй байхыг
анхааруулж, албан бичиг хүргүүлсэн тухай мэдэгдсэн юм.

 

Монголбанкнаас эдийн засгийн хүндрэлтэй байгаа ч ипотекийн зээлийн
санхүүжилтийг аль болох тасралтгүй үргэлжлүүлэх зорилгоор өөрийн эзэмшиж буй
ИЗББ-ын эргэн төлөлтийн хэмжээгээр буюу 25-35 тэрбум төгрөгийн санхүүжилтийг сар
бүр арилжааныбанкуудад олгож байгаа гэлээ. Харин арилжааны банкууд санхүүжилтээ
өөр зүйлд зарцуулж, орон сууцны зээл хүссэн иргэдэд худал мэдээлэл өгөөд байна
уу? Энэ талаар тодруулахаар нэр бүхий долоон банкыг сонгож,
харилцагчийн лавлах утас руу холбогдлоо.

 

-Танайх ипотекийн зээл
олгож байгаа юу?

Голомт
банк: Ипотекийн зээл өгч эхлээгүй байна. Одоогоор хэзээ олгох тухай мэдээлэл
алга. Гэхдээ манайхтай харилцдаг дөрвөн компанийн ажилчдад тодорхой хэмжээгээр
орон сууцны зээл олгож байгаа.

Хаан
банк: Ипотекийн зээл олгоогүй… Харин манай санхүүжилтээр боссон барилгаас
худалдан авахаар сонголтоо хийсэн тохиолдолд материалыг нь хүлээн авч байгаа.

Төрийн
банк: Гэрээтэй 10 байгууллагад л зээл олгож байгаа.

Худалдаа
хөгжлийн банк: Манай санхүүжилтээр боссон барилгаас сонгосон тохиолдолд
зээл хүссэн өргөдлийг нь хүлээн авч байгаа. Өөр барилгуудад зээл олгохгүй

Капитал
банк: Өөрийн барьсан барилгуудаас сонговол зээл олгоно. Өөр тохиолдолд зээл
олгохгүй байгаа.

Улаанбаатар
хотын банк: Хамтран ажилладаг долоон компанийн барилгаас сонговол
зээлийн материал хүлээн авч байгаа. Бусад тохиолдолд зээл олгох боломжгүй.

Хас
банк: Яг одоогоор зээлийн материал хүлээн авахгүй байна. Өмнө нь авсан
материалуудаа хянаж дуусаад шинээр зээл хүссэн өргөдөл авах байх. Одоогоор
тодорхойгүй байна.

Эндээс арилжааны банкууд ипотекийн зээл
олгохгүй байгаа гэж ойлгож болохоор. Гэхдээ бага хэмжээнд өөрийн банкнаас зээл
авсан, эсвэл хамтран ажилладаг, эсвэл өөрсдөө барьсан барилгуудад зээл олгож
байгаа гэлээ. Тэгэхээр Монголбанкнаас өгсөн санхүүжилтээр арилжааны банкууд
өөрсдийн бизнесийг дэмжиж байна гэж ойлгоход буруудахгүй нь бололтой. Өөрөөр
хэлбэл төрөөс явуулж буй найман хувийн хүүтэй орон сууцны зээлийн хөтөлбөрийг
арилжааны банкууд өөрийн бизнесийг дэмжих, өөрийн харилцагч, өөрийн зээлдэгч
нарыг дэмжих зорилгоор л ашиглаж байна. Харин төв банк ипотекийн зээл хүсэгчдэд
зээл олгоорой хэмээн сар бүр 35 тэрбум төгрөгийн санхүүжилтийг арилжааны
банкуудад олгосоор л байдаг. Үнэндээ энэ санхүүжилт нь зорилтод бүлэгтээ хүрч
чадахгүй арилжааны банкуудын сейфэнд түгжигдчихээд байна шүү дээ.

Амар