ХЭҮК-оос ТҮЦ эрхлэгчдээс ирүүлсэн гомдлын талаар өнөөдөр мэдээлэл хийлээ.
ХЭҮК-ын гишүүн Б.Энхболд” ТҮЦ эрхлэгчдийн зүгээс ТҮЦ-үүдийг албадан нүүлгэж байгаа нь хүний эрхийг зөрчиж байна гэх агуулгатай 10 удаагийн гомдол мэдээлэл ирүүлсэн.
Бид гомдол мэдээллийн дагуу хяналт шалгалтыг хийж, талуудын уулзалтыг хэд хэдэн удаа зохион байгуулаад байна. Тэдний тавьсан саналыг авч үзэх ёстой. Өнөөдрийн байдлаар 20 орчим иргэн ХЭҮК-ын гадна суулт зарлаж, долоон иргэн өлсгөлөн зарлаад байна.
ХЭҮК-оос хуулийн дагуу шалгалтын ажиллагааг өргөн цар хүрээтэй хийсэн. Шалгалтын үр дүнд дараах нөхцөл байдал тогтоогдсон. Газар чөлөөлөх явцад зарим иргэний эрх зөрчигдөж, хүнлэг бус харьцсан, эд хөрөнгөд хохирол учирсан, удирдлага зохион байгуулалтаар хангаж, хүний эрхийн зөрчил гарахаас урьдчилан сэргийлэх зэрэг шаардлагатай арга хэмжээг аваагүй байна. Мөн хүн тус бүртэй уулзаж, санал болгох ажлын байр, түрээслэх зах худалдааны төвийн лангуу болон бусад боломжуудаа танилцуулж яриа хэлэлцээр хийснээ баримтжуулаагүй. Засаг даргын 2025 оны хоёрдугаар сарын 14-ний өдрийн А/237 дугаар захирамжийг гардуулан өгч газар чөлөөлөх ажиллагааны талаар бүрэн мэдээллийг өгөөгүй.
Үүнтэй холбоотойгоор ТҮЦ эрхлэгчдийн зүгээс шүүхэд хандах эрх нь хязгаарлагдсан байж болзошгүй нөхцөл байдал тогтоогдсон.
Түүнчлэн нүүлгэн шилжүүлэх ажиллагааг бусдаар хийлгүүлэхдээ удирдлага зохион байгуулалтаар хангах талаар шаардлагатай арга хэмжээг аваагүй. Дөрөвдүгээр сарын 4-нд мэдэгдэх хуудас өгөөд дөрөвдүгээр сарын 8-аас ТҮЦ-үүдийг албадан нүүлгэсэн. Нүүлгэх явцад Сүхбаатар дүүрэгт хоёр, Баянзүрх дүүрэгт нэг тохиолдол илт хүний эрхийг зөрчсөн шинжтэй байсан.
Одоогийн байдлаар хотын даргын захирамж түдгэлзээгүй байгаа учраас иргэд гомдол гаргаж байгаа. Тухайн захирамжийг гардан авсантай холбоотойгоор хотын даргад өөрт нь эсвэл шүүхэд гомдол гаргах ёстой. Албадан нүүлгэн шилжүүлэх явцад иргэдэд мэдэгдэх хуудас өгсөн ч захирамжийг гардуулж өгөөгүй. Ингээгүйгээс иргэд шүүхэд гомдол гаргах эрх нь хязгаарлагдсан байдал тогтоогдсон. ХЭҮК нийслэл, дүүргийн удирдлагуудтай тавдугаар сарын 1-нд уулзаж, гомдол санал гаргасан иргэдтэй нэг бүрчлэн уулзаж санал хүсэлтийг нь сонсох, үр дүнтэй хэлэлцээр хийх, нүүлгэн шилжүүлэх арга хэмжээг авахдаа хүний эрхийг хүндэтгэж бусдын эд хөрөнгийг гэмтээж устгахаас урьдчилан сэргийлэх бүх арга хэмжээг авах зөвлөмжүүдийг өгсөн.
Энэ уулзалтаас тодорхой үр дүн гараагүй. Нүүлгэх үйл ажиллагаа нь улам эрчимжсэн талаар иргэд дахин ХЭҮК-т хандсан. Дээрх нөхцөл байдалтай холбоотойгоор дараах арга хэмжээ авахыг Нийслэлийн Засаг даргад зөвлөж байна.
Үүнд,
-
Дүүрэг тус бүр гомдол гаргасан иргэдийг хүлээж авч уулзаж бүх талын зөвшилцөлд хүрэх
-
Хүний эрхийн зөрчил гаргасан албан тушаалтанд хариуцлага тооцох
-
Төрийн албан хаагчдыг хүний эрхийн сургалтад суулгах зөвлөмжийг хүргүүллээ" гэв.
