Дэлхийн хамгийн өндөрлөг Эверест уулын ноён оргил 8848 метрийн өндөрт Монголын уулчин ОУХМ А.Баттогтох, Б.Батхишиг нар өчигдөр /2025.05.18/ өглөө гарлаа.
Тэд дөрөвдүгээр сарын 13-ны Түвдийг зорьсон бөгөөд өнгөрсөн долоо хоногт авиралтаа эхлүүлж, өчигдөр амжилттай оргилдож, Эверестийн оргилд мөрөө үлдээсэн Монгол Улсын 15, 16 дахь уулчин болж байна.
ОУХМ Б.Батхишиг хорт хавдар өвчнийг даван туулж эмчилгээгээ бүрэн дуусгасан ба цас, мөсөн дундуур байгаль цаг уурын хамгийн хатуу ширүүн, хүнд хэцүүг даван туулан дэлхийн дээвэрт гарч, хорт хавдар өвчнийг даван туулж эрүүл болсноо зарлах зорилго тээн энэхүү аяллыг хийсэн юм.
Тэрбээр Эверестийн оргилд гарч зорилгодоо хүрснээр энэ өвчин эдгэрдэг, сэтгэлээр унаж шантралгүй эмчилгээгээ үргэлжлүүлж, давхар биедээ тохирсон спорт болон бусад сонирхлоо хөгжүүлж идэвхтэй амьдрахыг уриалав.
Дэлхийн дээвэр Эверестийн оргилд манай улсаас:
-
Гавьяат тамирчин Г.Өсөхбаяр (2005 онд)
-
Гавьяат тамирчин Б.Гангаамаа (2011 онд)
-
ОУХМ С.Бат-Эрдэнэ (2012 онд)
-
Л.Баярсайхан (2012 онд)
-
Гавьяат тамирчин Б.Цэвээндаш (2012 онд)
-
ОУХМ Ц.Цогзолмаа (2012 онд)
-
ОУХМ Ж.Бямбасүрэн (2018 онд)
-
ОУХМ Б.Гантулга (2022 онд)
-
ОУХМ О.Золбоохүү (2023 онд)
-
ОУХМ С.Ганхүү (2023 онд)
-
ОУХМ Ц.Гэрэлт-Од (2023 онд)
-
ОУХМ Ц.Анхбаяр (2023 онд) нар амжилттай авиран эсэн мэнд буусан бол
-
Л.Пүрэвсүрэн, Ц.Өсөхжаргал нар (2024 онд) Эверестийн оргилд гарсан боловч буух замдаа харамсалтай нь нас барсан юм.
