![\"\"](http://undesten.mn/uploads/posts/2017-04/1491802315_schloss-neuwaldegg-41_full.jpg "\\"\\"")
Морин хуурч Б.Санжаажав 2016 оны 9-р сард монгол үндэстний сонгодог хөгжмийн зэмсэг болох \”Морин хуур” хөгжмийг Австри улсын Вена хот дахь Франц Шубертын нэрэмжит нарийн мэргэжлийн хөгжмийн консерваторийн сургалтын системд нэвтрүүлэх тухай хөтөлбөр, төсөл оруулжээ. Консерваторийн сургалтын алба болон удирдах зөвлөл нэг сарын турш хуралдан хэлэлцсэний үр дүнд Франц Шубертын нэрэмжит нарийн мэргэжлийн хөгжмийн консерваторид албан ёсоор \”Морин хуур”-ын анги нээх шийдвэр, эрх хүлээн авсан байна.
Үүнээс хойш тус сургуулийн сургалтын албатай хамтран бэлтгэсэн морин хуур хөгжмийн 4 жилийн бакалаврын зэргийн сургалтын хөтөлбөр, төлөвлөгөөг тус сургуулийн сургалтын хөтөлбөртэй нийцүүлж илүү боловсронгуй болгох тухайд шамдан ажилласнаар 2017 оны 2-р сард тус сургуулийн захирал хатагтай Даниела Эгг морин хуурын ангийн бакалаврын зэргийн 4 жилийн сургалтын хөтөлбөр төлөвлөгөөг албан ёсоор баталжээ. Ингэснээр Франц Шубертын нэрэмжит нарийн мэргэжлийн хөгжмийн консерваторид албан ёсоор \”Морин хуур”-ын анги нээгдэж байна.
Монгол улсаас болон дэлхийн өнцөг булан бүрээс монголын болон гадаадын оюунтнууд Франц Шубертын нэрэмжит консерваторид нарийн мэргэжлийн хөгжмийн боловсрол эзэмшээд зогсохгүй \”Морин хуур” хөгжмөөр бакалаврын зэрэг хамгаалан төгсөх бүрэн боломж нээгдэж буй юм.
Гадаадын оюунтнуудын хувьд монгол улсын үндэсний хөгжмийг суралцаад зогсохгүй монголын соёл, урлагтай танилцан суралцах боломж бүрдэж байна. Мөн Монгол улсын аялал жуулчлалын салбарт ч өндөр ач холбогдолтой. Монгол оюунтнуудын хувьд Авcтри улсын болон Европын сонгодог хөгжмийн түүх соёл, ёс заншилтай танилцахаас гадна хөгжмийн өндөр боловсрол мэдлэг олж авах бүрэн боломж нээгдэж, энэ нь эргээд эх орондоо, монголын соёл, урлагийн салбарт нэн шаардлагатай боловсон хүчин болон бэлтгэгдэх гарц нээгдэж буй.
Эх сурвалж. TV5.mn
