МАН-ын Удирдах зөвлөлийн хуралдаанд ирсэн гишүүдээс дараагийн Ерөнхий сайдыг ямар хүн байгаасай гэж хүсэж байгаа талаар байр суурийг тодрууллаа.
Тодруулбал, Ч.Хүрэлбаатар, Ж.Ганбаатар, Д.Тогтохсүрэн, Ц.Даваасүрэн нар эдийн засгийн өнөөгийн хүндрэлийг засах хүнийг Ерөнхий сайдаар ажиллуулах нь зүйтэй гэв.
Иргэдийн худалдан авах чадвар суларч, ам.долларын нөөц багасч, ханш өсөж, экспортын орлого буурч, төсөвт суусан төслүүдэд зарцуулах хөрөнгө оруулалт ч хүндэрсэн гэдгийг тэд дурдсан.
Д.Тогтохсүрэн: Ерөнхий сайд болох хүн санхүү эдийн засгийн хувьд өндөр мэдлэгтэй байх хэрэгтэй байна. Ер нь маш сайн бэлтгэгдсэн хүн байх ёстой. Дурын хүн Ерөнхий сайд болчихдог юм биш. Би хүний нэр цохож хэлмээргүй байна. Намын дүрмээрээ намын дарга Ерөнхий сайд хийх ёстой ч энэ удаа намын дарга биш хүн сонгох шаардлага үүссэн тул олон талаас нь бодолцох хэрэгтэй болов уу.
Миний хувьд хатуу байр суурьтай байдаг зүйл бол 2019, 2023 оны Үндсэн хуулийн өөрчлөлтийн цаад үндсэн агуулга нь Монгол Улсын намууд эв, эетэй байж, хамтарч эх орноо хөгжүүлэх ёстой гэсэн зарчим байдаг. Тиймээс энэ чиглэлээр явах ёстой байсан. Дангаараа болон хамтарсан Засгийн газрын бүтэц мэдээж харилцан адилгүй өөр. Хэрэв одоо дангаараа засаглана гэх юм бол энэ том данхгар бүтцийг эрс багасгах ёстой.
Ц.Даваасүрэн: Төрийн гурван өндөрлөгийн нэг болох Ерөнхий сайд иргэдийн итгэлийг хүлээсэн хүн байх ёстой. Энэ бол дурын хүн хийх ажил биш юм.
Одоо яаж байна гэхээр өөрийнхөө нэрийг цахим сүлжээнд ил тод зарлаж байна.
Эдийн засгийн нөхцөл амаргүй үед энэ байдлыг засах хүн Ерөнхий сайд болох нь зөв. Мөн төрийн албаны бүх шатанд ажилласан, улс төрийн туршлагатай болсон байх нь чухал. Хат суусан, ноён нуруутай, шуналгүй байх хэрэгтэй. Бусдад хүлээн зөвшөөрөгдөх нь цаг хугацааны асуудал.
Ерөнхий сайд болох хүн гээд зарим хүний талаар бичихээр миний нүүр улайх юм.
УИХ-ын гишүүн болж чадаагүй хүн Ерөнхий сайд болохгүй байх. Энэ нь боломжгүй. Ард түмнээ гэгээлэг байлгахын тулд иргэдийн найдварыг тээх нь чухал. Бид ярилцаад шийднэ.
Мөнгөтэй нь сайд боллоо гэж их шүүмжилдэг. Сайд нар салбартаа хүлээн зөвшөөрөгдсөн хүн байх ёстой.
Одоо ямар байна гэхээр сайдууд өөрсдөө мэргэжлийн бус тул мэргэжилтнийхээ үгээр шийдвэр гаргадаг. Салбарын бодлогыг мэргэжилтнүүд шийдэж байна. Өмнө нь хамгийн шилдэг нь сайд болдог байв.
Бусдын саналыг шүүн тунгаагаад сайд өөрөө шийдвэр гаргах ёстой. Түүнээс давхар дээлтэй эсэх нь чухал биш. Өөрсдийгөө дагасан жулдрайнуудыг сайдаар тавьсан тул Засгийн ажил яваагүй.
Ж.Ганбаатар: Би УИХ-ын Эдийн засгийн байнгын хорооны дарга удаан хийсэн, эдийн засагч хүний хувьд хэлэхэд эдийн засагт анхаарсан, улс оронд үүссэн эдийн засгийн нөхцөл байдлыг даван туулах хүн байгаасай гэж хүсэж байна.
Иргэдийн худалдан авах чадвар буурч байна, ам.долларын ханш өсөж байна, өмнөх онуудтай харьцуулахад экспорт буурч байна.
Эдгээрийг шийдвэрлэсэн, аж ахуйн ажил руу хандсан, олон том ажил ярихаас илүү хийж байгаа ажил нь хүнд харагдсан хүн байгаасай гэж бодож байна
Ч.Хүрэлбаатар: МАН-ын УЗ хуралдаж намын бага хурал хэзээ болохыг товлоно. Хэн нэгэн хүний нэрийг ярихаас өмнө шинэ Засгийн газрын өмнө ямар асуудал тулгарч байгааг ярих болов уу.
Эдийн засгийн нөхцөл байдал хүнд байна, экспортын орлого унасан, төсвийн орлого бүрдэхгүй байна.
Төсөвт суусан ажлуудыг хийхэд хүндрэлтэй болж байна, валютын нөөц нэлээн доошилж, ханш хүчээр барьж байна. Монгол Улсын эдийн засгийн тулгуур, хөдөлгүүр болсон хувийн хэвшлээ яах вэ гэдэг асуудал байна. Эдийн засгийн нэлээн олон салбарт хүндрэл үүссэн учраас үүнийг харж байж хүнээ ярих болов уу гэж бодож байна.
Олон улсын нөхцөл байдал, улс төрийн байдал ч тодорхой биш байгаа үед Монголын төр тал талаас нь нөхцөл байдлаа харж ярилцах нь зөв.
