ХХОАТ-ын тухай хуульд өөрчлөлт оруулах тухай хуулийн төслийн хэлэлцүүлэг Төрийн ордонд болло. 100 мянган иргэний саналыг үндэслэн УИХ-ын гишүүн Ж.Баярмаа, О.Амгаланбаатар, Б.Пунсалмаа, Г.Очирбат нар хуулийн төсөл санаачлан ажиллаж байгаа юм.
Өнөөдрийн хэлэлцүүлэгт иргэд, аж ахуйн нэгжийн төлөөлөл оролцож өөрсдийн саналыг хэлсэн.
Хуулийн төслийг санаачлагчдын нэг УИХ-ын гишүүн О.Амгаланбаатар “Гурав хоногийн дотор 100 мянган иргэн гарын үсэг зурж байна гэдэг чинь хэрэв нэг сарын хугацаатай байсан бол татвар төлдөг бүх хүн гарын үсэг зурах байсан. Тэгэхээр ард иргэдийн хувьд нэн шаардлагатай хууль гэдэг нь харагдаж байгаа юм.
Нэг талаас улсын төсөв тасалдах юм биш үү гэж байгаа боловч иргэдийн нуруунд ирж байгаа амьдралын өртөг хэрээс хэтрээд байна. Авч байгаа бүх юм нь өссөн ч цалин өсөөгүй. Бид орлогыг нь нэмэгдүүлж чадахгүй юм бол ядаж татварыг нь багасгаах хэрэгтэй.
Улсын төсвийн зарцуулалтыг ч харах шаардлагатай. 14 мега төсөл гэх мэт ямар ч үр дүнгүй зүйлд их мөнгө зарцуулсан. Цоорхой хувинд ус хийж байгаатай адил. 2.5 сая төгрөгийн цалингийнх нь 10 хувийг авчхаад тэрийгээ үр дүнтэй зүйлд зарцуулахгүй байна. Улсын төсвийн зарцуулалтаас зөв зарцуулаад амьдралын чанар сайжирч байвал өөр. Гэвч ямар ч үр дүн гарахгүй байна” гэлээ.
