Ерөнхий сайд Г.Занданшатар өчигдөр /2025.06.21/ ХӨСҮТ-д ажиллалаа. Энэ үеэр Эрүүл мэндийн сайд Ж.Чинбүрэн улаанбурхан өвчний халдварын нөхцөл байдлыг танилцууллаа.
ХӨСҮТ-өөс өчигдөр улаанбурханы халдвар авсан хүний 8648 гэж мэдээлж байсан бол өнөөдөр 9096 болж хоногт 448-аар нэмэгджээ. Халдвар авсан хүмүүсийн дийлэнх буюу 4000 орчим нь 10-14 нас, 1700 нь 0-4 насныхан байна.
Эрүүл мэндийн сайд Ж.Чинбүрэн, 1980-аад оноос дэлхий даяар улаанбурханы эсрэг вакцин хийж эхэлсэн. Ковид цар тахлын үед халдварын 1000 тохиолдолд хоёр хүн буюу 135 хүн эндэж байсан бол улаанбурханы 100 тохиолдолд 1-1.5 хүн эндэж байна. Тэгэхээр улаанбурхан өвчний халдвар ковидоос ноцтой гэдгийг батлах тоо баримт энэ. Манай улсад одоогийн байдлаар долоон хүн эндсэн.
Улаанбурханы халдвар авсан хүний тоо өчигдөр 8648 байсан бол өнөөдөр 9096 болж, хоногт 448-аар нэмэгджээ.
Халдвар их гарч байгаа улс орнуудад товлолын есөн сарыг хүлээхгүй, зургаан сартайгаас нь шууд хийхийг ДЭМБ-аас зөвлөж байна. Манай улс хийгээд эхэлсэн.
Товлолт вакциндаа ороогүй нийт хүүхдийн тоо 231 мянга байна. Одоо наадам болж, олуулаа цуглаж халдвар дамжих эрсдэл нэмэгдэнэ. Тиймээс вакцин хамрагдаагүй хүүхдүүд болон халдвар авсан хүнтэй хавьтал болсон хүн бүрийг вакцинжуулж байна.
Улаанбурханы халдвар 10 жилийн давтамжтай дэгддэг. 2015-2016 онд гарсан халдварын үед 6 сартайгаас 5 нас хүртэлх хүүхдүүдийн 94 хувийг нэмэлт дархлаажуулалтад хамруулж чадаж байсан. Халдвар авч, халдварыг тархааж болох бүх хүн амыг вакцинжуулалтад хамруулах нь чухал үр дүнтэй.
Өвчлөлгүй байсан Баян-Өлгийд 6-р сарын 20-ны өдөр халдвар бүртгэгдэж, Монгол Улс даяар халдвар тархсан. Сэлэнгэ, Говьсүмбэр, Увс аймгууд вакцины насныхныг 100 хувь хамруулсан байна.
Өвчилсөн 8000 хүний 71.5 хувь нь вакцин хийлгээгүй. Тэгэхээр вакцин эсэргүүцэгч нарт боль оо, битгий гай болоод бай. Үүний чинь цаана хүн үхээд байна шүү дээ. Тэгвэл өвдсөн хүүхдүүдийг аврах замаа заагаад өг гэж хэлмээр байгаа юм.
