Трамп Япон, Өмнөд Солонгосын импортын бараа бүтээгдэхүүнд 25%-ийн татвар ногдуулахыг зарласан бөгөөд уг шийдвэр 8-р сарын 1-нээс хүчин төгөлдөр болно. Мөн нэмээд хэдэн арван жижиг улс орны бараанд 10%-иас доошгүй тариф ногдуулах тухай захидал удахгүй илгээнэ гэж тэр хэлэв.
АНУ-д орж ирэх импортын ихэнх бараанд ногдуулах татварын хэмжээг наймдугаар сарын 1-нээс дахин нэмэгдүүлэх тухай шийдвэр гарахаас өмнө хийгдсэн цөөн хэдэн хэлэлцээр байгаа. Эдгээрийн нэг нь Индонезтой хийсэн хэлэлцээр юм. Харин Канад ба Европын холбооны улсууд АНУ-тай хэлэлцэн тохирч чадахгүй бол хариу арга хэмжээ авахад бэлэн байгаагаа тэд мэдэгджээ.
Трамп саяхан 26 хувийн тарифын хүүтэй тулгараад байгаа Энэтхэгтэй хэлэлцээр хийх тухай давтан хэлсэн боловч дэлгэрэнгүй мэдээлэл өгөөгүй байна. Энэтхэгийн худалдааны төлөөлөгчид Вашингтонд шинэ хэлэлцээ хийхээр хүрэлцэн ирээд байна.
Европын холбооны худалдааны асуудал эрхэлсэн төлөөлөгч Марос Сефчович мөн тарифын асуудлаар хэлэлцээ хийхээр Вашингтоныг зорьсон гэж ЕХ-ны хэвлэлийн төлөөлөгч Ройтерс агентлагт мэдээлэв. Трамп 8-р сарын 1-нээс эхлэн ЕХ-ноос импортлох бараа бүтээгдэхүүнд 30 хувийн татвар ногдуулна гэж сүрдүүлсэн нь Европ үүнийг хүлээн зөвшөөрөх боломжгүй бөгөөд дэлхийн хамгийн том хоёр зах зээлийн хоорондын хэвийн худалдааг зогсооно гэж үзэж байна.
АНУ нь худалдааны 1.2 их наяд долларын алдагдлыг бууруулахад анхаарлаа хандуулж байна гэж Трампын худалдааны хэлэлцээний ахлах төлөөлөгч Грир мэдэгдлээ.
Трамп тарифын бодлогоо танилцуулахдаа бүх улс орнуудад 10 хувийн татвар ногдуулахыг уриалсан бөгөөд харин хамгийн “асуудалтай” улс орнууд илүү өндөр тарифтай байна. Тухайлбал, Хятад улсад хамгийн өндөр тарифын хэмжээ буюу 55% ногдоно. Хэрэв улс орнууд хөрөнгө оруулахыг хүсвэл ерөнхийлөгч хэлэлцээ хийхэд бэлэн байгаа гэж Грир хэлэв.
