Дорнын эдийн засгийн чуулган гурав дахь өдрөө үргэлжилж байна. Орон нутгийн цагаар 14.00 цагт нэгдсэн хуралдаан эхлэв. Энэ хуралд энэ жилийн гол зочид болох Ерөнхий сайд Г.Занданшатар, Лаосын Ерөнхий сайд Сонесай Сипхандон, БНХАУ-ын Коммунст намын Улс төрийн товчооны гишүүн, Бүх Хятадын ардын төлөөлөгчдийн их хурлын Байнгын хорооны дэд дарга Ли Хунжун нар оролцож байна.
Ерөнхийлөгч Путин Алс Дорнодод эхлүүлсэн томоохон төслүүдийг танилцуулсан, дэлгэрэнгүй илтгэл тавьсны дараа Ерөнхий сайд Г.Занданшатар үг хэллээ.Ерөнхий сайдаас Монгол байгалийн хий хэрэглэх үү эсвэл зөвхөн дамжуулан өнгөрүүлэх үү гэж асуусан бол Ерөнхийлөгч Путинаас байгалийн хийн үнийг тодруулав.
Тэрээр “Бид бүс нутгийн интеграцад нэгдэх хүсэлтэй. Монгол Улс газар зүйн давуу талтай. Сүүлийн гурван жилийн турш манай эдийн засаг 6 хувиар өссөн. Гурван өдрийн өмнө Монгол, ОХУ, БНХАУ-ын төрийн тэргүүн нар Бээжинд уулзсан. Тэд ОХУ-аас БНХАУ руу нийлүүлэх байгалийн хийн хоолойг Монгол Улсын нутгаар дамжин өнгөрүүлэх зарчмын тохиролцоонд хүрсэн. Бид байгалийн хийг нутаг дээгүүрээ тогтвортойгоор, хариуцлагатайгаар дамжуулан өнгөрүүлнэ гэдгийг би мэдэгдэж байна. Засгийн газар энэ төсөлд шаардлагатай бүх дэмжлэгийг үзүүлнэ” гэв.
Ерөнхий сайд энэ төслийг хэрэгжүүлэхэд дэмжлэг үзүүлсэнд Ерөнхийлөгч Путинд талархал илэрхийллээ. Хэлэлцүүлгийн хөтлөгч, оросын сэтгүүлч манай Ерөнхий сайдаас Монгол байгалийн хий хэрэглэх үү эсвэл зөвхөн дамжуулан өнгөрүүлэх үү гэж асуусан бол Ерөнхийлөгч Путинаас байгалийн хийн үнийг тодруулав.
Ерөнхий сайд Г.Занданшатар түүний асуултад хариулахдаа, “Байгалийн хийг хэрэглээнд нэвтрүүлэх нь Улаанбаатар хотын агаарын бохирдлыг бууруулах сайн талтай. Байгалийн хийн хоолойн байгаль орчинд үзүүлэх нарийвчилсан үнэлгээг хийсэн. Монголын талын бэлтгэл ажил дууссан” гэсэн юм.
Мөн тэрээр гурван улс хамтран эдийн засгийн коридор байгуулах гэх мэт 33 төсөл хэрэгжүүлэх боломжтойг онцлоод Монгол-Хятадын хил дагуу төмөр замын томоохон төслийг эхлүүлсэн гэв.
Манай улс өнгөрсөн зургаадугаар сард Евразийн эдийн засгийн холбоотой Чөлөөт худалдааны гэрээг Минск хотод байгуулсан. Энэ гэрээ бүс нутгийн худалдаанд цоо шинэ хуудас нээснийг ч Засгийн газрын тэргүүн танилцууллаа.
ОХУ-ын Ерөнхийлөгч Путин “Гурван улсыг холбосон, байгалийн хийн шинэ хоолой барих төсөл нь дэлхийн эрчим хүчний салбарын том төслүүдийн нэг болно. Зууны төсөл гэхэд болно. 50 мянган метр куб хэмжээтэй байгалийн хийг бид нийлүүлнэ. Үнийг ААН-үүд тохиролцоно. Амаргүй байгаа ч энэ хэлэлцээ олон жилийн турш үргэлжилж байна. Байгалийн хийн хоолойн үнэ бүс нутаг бүрд өөр байдаг” гэв.
