ОХУ-ын ерөнхийлөгч Владимир Путин өчигдөр буюу Пүрэв гарагт иргэдийнхээ гар утасны интернэтийг хаах болсон шалтгааны талаар анх удаа тайлбар өгсөн байна.
Тэрээр “Гэмт хэрэгтнүүд эцсийн эцэст бүх зүйлийг сонсож, харж байдаг. Хэрвээ тэдэнд ямар нэг мэдээлэл хүрвэл гэмт хэрэг үйлдэх сэдэл болох нь гарцаагүй. Үүрэн холбооны интернэт үйлчилгээг хаах нь террорист халдлагаас сэргийлэх чухал хамгаалалт болно” гэлээ.
Украины дайн эхэлсэн цагаас хойш Оросын олон бүс нутагт интернэт сүлжээ тасалдах нь түгээмэл үзэгдэл болсон ч сүүлийн саруудад тасалдал улам нэмэгдсэн бөгөөд бухимдсан иргэд үүнийг “дижитал төмөр хөшиг” гэж нэрлэх болсон.
Өмнө нь Оросын эрх баригчид Telegram, WhatsApp зэрэг тодорхой платформуудыг аюулгүй байдлын үүднээс хааж байсан бол одоо интернэт сүлжээг бүхлээр нь хаадаг болоод байгаа.
Пүрэв гарагт хэлсэн үгэндээ Путин хууль сахиулах байгууллагуудад үйл ажиллагаандаа иргэдийн амин чухал ашиг сонирхлыг харгалзан үзэхийг уриалсан ч үндэсний аюулгүй байдал бүхнээс дээгүүр тавигдах ёстойг бас сануулжээ.
Мөн ОХУ-ын дижитал хөгжлийн сайд Максут Шадаевт онлайн үйлчилгээний “цагаан жагсаалт” гэх зүйлийг тасралтгүй ажиллуулахын тулд аюулаас хамгаалах албаныхантай нягт хамтран ажиллахыг даалгасан байна.
Уг жагсаалтад тасалдалд хамрагдахгүй ажиллах ёстой хэд хэдэн үйлчилгээ тусгасны дотор засгийн газрын хөгжүүлсэн Max мессенжэр, төрийн үйлчилгээнүүд, зарим том банкны үйлчилгээнүүд багтдаг.
- Путин энэ үеэр интернэтийн хоригийг тойрч гарах гол арга зам болдог VPN (Virtual Private Network) сүлжээний хэрэглээг хязгаарласан талаар дурдаагүй байна.
VPN сүлжээг хязгаарлах ажлыг яамныхаа тэргүүлэх зорилт болгож байгааг Шадаев гуравдугаар сарын сүүлчээр зарлаж байсан юм.
Эх сурвалж: kremlin.ru
