Францын хууль тогтоогчид Даваа гаригт (2025.09.08) ерөнхий сайд Франсуа Байруг огцруулах санал хураалт явуулжээ. Улмаар улс төрийн тогтворгүй байдал үүсч, эдийн засгийн хүндрэл, геополитикийн хурцадмал байдал нэмэгдэж байгаа энэ үед засгийн газаргүй болоход хүргэв. Нийт 364 парламентын гишүүн Байругийн эсрэг санал өгсөн бол 194 гишүүн түүнд саналаа өгчээ. Байру 51 тэрбум ам.доллартай тэнцэх хэмнэлтийн төлөвлөгөө буюу хоёр олон нийтийн баярыг цуцлах болон засгийн газрын зарим зардлыг царцаах төсөлд санал хураалт зарласан. Гэсэн хэдий ч тус санал хураалт нь түүнд итгэл үзүүлэх эсэх санал хураалт болон хувирчээ.
Францын хуульд 280 санал аливаа шийдвэрийн босго тул Байругийн эсрэг 364 хүн санал өгсөн нь түүний засаг захиргаа унахаас өөр аргагүй болсон.
Өнгөрсөн арванхоёрдугаар сард итгэл үзүүлэхгүй гэсэн санал хураалтад ялагдсан өмнөх ерөнхий сайд Мишель Барниерийнараас Байру есөн сарын дараа албан тушаалаасаа огцорч байна. Тэрбээр Мягмар гаригт ажлаа хүлээлгэн өгч магадгүй. Тус улсын ерөнхийлөгч Эммануэль Макрон ирэх өдрүүдэд шинэ ерөнхий сайдыг томилох боловч парламентын хуваагдал нь нөхцөл байдлыг хүндрүүлж байна. Сүүлийн үед Францын зах зээл буурч, улсын бондын хүү өсөн, зээлийн үнэлгээ доошлох эрсдэл үүссэн.
Эдийн засгийн нөхцөл байдал хүндэрч, төрийн зардлыг хэрхэн танах асуудал улс төрийн хурц маргаан дагуулж буй.
Макроны төвийн эвсэл өнгөрсөн жилийн ээлжит бус сонгуулиар суудал алдсанаар парламентын олонх болж чадаагүй. Улмаар аль ч хүчтэй улс төрийн төлөөллийг ерөнхий сайдаар томилсон ч дахин итгэл үзүүлэхгүй байх санал хураалттай тулж магадгүй байна. Ажиглагчдын үзэж буйгаар шинэ ерөнхий сайдад зэвсэгт хүчний сайд СебастиенЛекорню, хууль зүйн сайд Жеральд Дарманиннар нэрлэгдэж байгаа ч аль аль нь парламентын дэмжлэг авахад хүндрэлтэй байх бололтой. Энэ бүхний зэрэгцээ иргэдийн бухимдал нэмэгдэж, улс даяар эсэргүүцлийн жагсаал зарлагдаад байна. Зүүн жигүүрийн намууд болон үйлдвэрчний эвлэлүүд энэ долоо хоногийн Лхагва гаригт эсэргүүцлийн ажиллагаа зохион байгуулах бөгөөд есдүгээр сарын 18-нд дахин жагсаал хийхээр төлөвлөж байгаа юм. Олон улсын нөхцөл байдал ч тогтворгүй байгаа энэ үед Франц улс дотоодын улс төрийн хямралтай зэрэгцэн олон улсын тавцанд сул дорой харагдаж болзошгүй байна.
