АТГ-аас Эрүүгийн хуулийн 22.1.2, 22.4 дэх хэсэгт заасан үндэслэлээр Орчны бохирдлыг бууруулах үндэсний хороо болон “Тавантолгой түлш” компанийн албан тушаалтнуудад холбогдох хэрэг бүртгэлтийн хэргийг 2023 оны нэгдүгээр сарын 10-ны өдөр нээжээ.
Улмаар эрх мэдэл, албан тушаалын байдлаа урвуулан ашиглаж арилжааны гэрээг хууль бусаар байгуулсан, хахууль авсан гэх гэмт хэрэгт Ц.Чулуунзагд нарын нэр бүхий албан тушаалтныг холбогдуулан мөрдөн шалгах ажиллагааг үргэлжлүүлж буй юм байна.
Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгтээс тодруулахад “Мөрдөн шалгах ажиллагааны явцад 2025 оны есдүгээр сарын 10-ны өдөр Ч-ын ажлын байр болон орон сууцанд нэгжлэг хийхэд гэмт хэргийн шинжтэй ул мөр илэрсэн. Иймд Эрүүгийн хэрэг хянан шийдвэрлэх тухай хуулийн дагуу Ч-г баривчилсан. Улмаар түүнд эрүүгийн хэрэг үүсгэн яллагдагчаар татан, 30 хоног цагдан хорих шүүхийн шийдвэр гарсан байгаа” гэв.
Хэрэгт холбогдогч Ч-ын гэр, албан тасалгаанд прокурорын зөвшөөрлөөр явуулсан нэгжлэгийн явцад “Админерал” ХХК-ийн гүйцэтгэх захирлаар ажиллаж байгаад 2025 оны гуравдугаар сард нас барсан БНХАУ-ын иргэний нэр бүхий гарын үсгийн дардас олдсон. Энэ гарын үсгийн дардсыг тухайн иргэн нас барснаас нь хойш яллагдагч Ч ашиглаж байсан эсэхийг тогтоох мөрдөн шалгах ажиллагаа үргэлжилж байгааг албан бус эх сурвалж мэдээллээ.
Ташрамд мэдээлэхэд, 2023 онд нүүрсний сонсгол зохион байгуулсан. Энэ үеэр “Эрдэнэс Тавантолгой” ХК-ийн Таван толгой ордын Бортээгийн уурхайд хөрс хуулалт, нүүрс олборлолт, өрөмдлөг, тэсэлгээ, нүүрс баяжуулах үйлчилгээ үзүүлэгчийг сонгон шалгаруулах тендерийн явц, тендерт шалгарсан компаниудын эцсийн өмчлөгчдийн улстөрийн хамаарлыг шинжээч танилцуулсан.
Тус тендерт “Админерал” ХХК шалгарсан. Компанийн гүйцэтгэх захирал нь Ц.Лхамжав бөгөөд тэрбээр МАН-ын Хэвлэл, цахим бодлогын газрын дарга Ц.Чулуунзагдын (тухайн үеийн) төрсөн ах болохыг шинжээч мэдээлсэн юм. Гэвч сонсголын үеэр Ц.Чулуунзагд энэ компанитай огт хамааралгүй гэж байв
