УИХ-ын намрын чуулган өчигдөр нээлтээ хийж, 2026 төсвийн тухай хуулийн төслийг хэлэлцэж эхэллээ. Ирэх оны төсвийн төслийн онцлог нь улсын төсөвт хэлэлцэхдээ анх удаа ард иргэдийн саналыг авсан бөгөөд 240 мянган иргэн санал, хүсэлтээ өгчээ.
Монгол Улсын Ерөнхий сайд Г.Занданшатар УИХ-ын чуулганы нэгдсэн хуралдаанд ирэх оны төсвийн төслийг танилцуулснаас хэсэгчлэн хүргэж байна.
Ерөнхий сайд, Ард түмний хүсэл, нийгмийн захиалга тодорхой байна. Иргэд:
-
Эрүүл мэнд, боловсрол, эрчим хүчинд илүү их хөрөнгө оруулах,
-
Хавтгайрсан халамжийг хязгаарлах,
-
Татвар, хураамжийн ачаалал, дарамтыг хөнгөлөх энэ гурван чиглэлд монголчууд санал нэгтэй байна.
Төсөв бол зүгээр нэг тооны нийлбэр биш. Тэр тоо юу өгүүлж байна вэ гэдэг нь хамгийн чухал. Төсөв бол чанар, өгөөжийн хэмжүүр. Иймээс бид иргэдийнхээ хүсэл, нийгмийн захиалгатай нийцүүлж, эрүүл мэндийн салбарын хөрөнгө оруулалтыг 5.5 дахин, боловсролын салбарын хөрөнгө оруулалтыг хоёр дахин нэмэхээр төлөвлөлөө. Гадаад зээл, тусламжийг энэ чиглэлд түлхүү чиглүүлж, үр дүнд хүрэхээр тооцлоо.
Энэ бол Засгийн газрын 2026 онд ард иргэдээсээ авсан онцгой даалгавар:
-
Хавдар судлалын үндэсний төв-II, Зүрх–судасны үндэсний төвийг шинээр барьж эхлүүлэх,
-
Гэмтэл согогийн үндэсний төвийг өргөтгөн бэхжүүлэх,
-
17 аймгийн яаралтай болон эрчимт эмчилгээний тасгийг иж бүрнээр шинэчлэх;
-
Нийслэлд сургуулийн ачааллыг бууруулах 117 шинэ сургууль, 73 шинэ цэцэрлэг, 32 дотуур байр барих.
Хүүхэд бүр дэлхийн монгол иргэний хэмжээнд эрдэм мэдлэг эзэмших, багш бүр хийснийхээ хэрээр цалинжих нөхцөлийг бүрдүүлэхийн тулд боловсролын салбарын урсгал төсвийг 100 тэрбум төгрөгөөр нэмэгдүүллээ.
Ахмад настнуудынхаа тэтгэврийг үнийн өсөлттэй уялдуулж, дундаж тэтгэврийг 901 мянган төгрөгт хүргэхээр тусгалаа.
Хүнээс гал, гэрэл гуйдаггүй болох зорилгоор эрчим хүчний хараат байдлыг бууруулж, 3.9 их наяд төгрөгийн дотоод хөрөнгө оруулалтаар эх үүсвэрээ нэмэгдүүлнэ. Үйлдвэрлэлээ 3.5 сая мегаватт-цагаар нэмэгдүүлснээр импорт багасаж, цахилгаан тасалдал, тарифын дарамт багасна.
Монгол хэмээх нэгэн айл хөршөөсөө гэрэл, дулаан гуйдаг биш, өөрөө галаа манадаг, өөрөө галаа бадраадаг байх учиртай гэв.
