Зорчигчдын бүртгэл болон нислэгийн системүүдийг чиглэсэн кибер халдлага Европын хэд хэдэн томоохон нисэх буудлуудын агаарын хөдөлгөөнийг тасалдуулж, нислэгүүдэд саатал учруулаад байна.
Зорчигчдын хувьд нөлөө нь бага мэт боловч энэхүү халдлага нь аюулгүй байдлын системийн сул талыг илчилсэн гэж шинжээчид үзжээ.
Электрон системийн доголдлыг анх Брюссель, Берлиний Бранденбург болон Лондонгийн Хитроу нисэх буудлуудаас мэдээлсэн бөгөөд зөвхөн гар аргаар бүртгэл хийх боломжтой болсон байна. Харин бусад олон Европын нисэх буудлууд үйл ажиллагаа нь хэвийн үргэлжилж байгааг мэдэгджээ.
“9 дүгээр сарын 19-ний Баасан гарагийн орой бүртгэл, суултын системийн үйлчилгээ үзүүлэгч байгууллага руу чиглэсэн кибер халдлага гарсан бөгөөд Брюссель нисэх буудал зэрэг хэд хэдэн Европын нисэх буудлууд өртсөн” хэмээн Брюссель нисэх буудал мэдэгдэж, эхэндээ нислэгийн хуваарьт нөлөөлсөн гэж мэдээлсэн байна.
Нисэх буудлуудын мэдэгдсэнээр асуудал нь нисэх буудлууд эсвэл агаарын тээврийн компаниудтай бус, харин бүртгэл болон зорчигч онгоцонд суух системийн үйлчилгээ үзүүлэгчтэй холбоотой аж.
Кибер халдлагыг хэн үйлдсэн нь тодорхойгүй байгаа ч шинжээчид хакерууд, зохион байгуулалттай гэмт бүлэглэл, эсвэл төрийн байгууллага байж болзошгүй гэж үзэж байна.
Эх сурвалж: AP news
