Оюутолгойн бүлэг ордын талбай дотор ашигт малтмалын ашиглалтын тусгай зөвшөөрөл эзэмшдэг “Онтрэ” ХХК-ийн хувьцааны төрийн эзэмших хувь хэмжээг хууль тогтоомжид нийцүүлэн тогтооно.
Үүний тулд хөрөнгө оруулагч талтай хэлэлцээ хийх, холбогдох асуудлыг Улсын Их Хуралд танилцуулах үүрэг бүхий ажлын хэсэг байгуулжээ.
Аж үйлдвэр, эрдэс баялгийн сайд энэ ажлын хэсгийг ахалжээ. Бүрэлдэхүүнд нь
-
Монгол Улсын Тэргүүн шадар сайд бөгөөд Эдийн засаг, хөгжлийн сайд,
-
Сангийн сайд,
-
Хууль зүй, дотоод хэргийн сайд,
-
Байгаль орчин, уур амьсгалын өөрчлөлтийн сайд,
-
Засгийн газрын Хэрэг эрхлэх газрын дэд дарга,
-
Татварын ерөнхий газрын дарга,
-
Ашигт малтмал, газрын тосны газрын дарга,
-
Үндэсний геологийн албаны дарга,
-
Эдийн засаг, хөгжлийн яамны Макро эдийн засгийн бодлогын газрын дарга, Сангийн яамны Татварын бодлогын газрын дарга,
-
Хууль зүй, дотоод хэргийн яамны Хууль зүйн бодлогын газрын дарга нар ажилладаг.
Ажлын хэсгийн нарийн бичгийн даргаар “Эрдэнэс Монгол” ХК-ийн гүйцэтгэх захирал томилогджээ. Ажлын хэсгээс “Эрдэнэс Монгол” ХХК, “Эрдэнэс Оюутолгой” ХХК-тай албан уулзалтыг зохион байгуулж, тодорхой үүрэг чиглэл өгсөн байна.
“Эрдэнэс Оюутолгой” ХХК-д “Онтрэ” ХХК-ийн эзэмшиж буй тусгай зөвшөөрлүүдтэй холбогдох хууль зүйн асуудлаар тодорхой санал, дүгнэлтүүдийг боловсруулахыг үүрэг болгожээ.
Ажлын хэсгийн хуралдаанд уг дүгнэлтүүдээ танилцуулж, цаашид хэлэлцээг хууль тогтоомжид нийцүүлэхэд онцгой анхаарч байгаа хэмээн сайд УИХ-ын гишүүдэд өнөөдөр танилцуулав. Түүнчлэн “Онтрэ” ХХК, тус компанийн эзэмшдэг ашиглалтын тусгай зөвшөөрөлтэй холбоотой хуулийн асуудлыг ажлын хэсэг нарийвчлан судлах үүргийг холбогдох яамдын төлөөлөл, компаниудын хуулийн багт үүрэг болгожээ. Ойрын хугацаанд нэгдсэн танилцуулга бэлтгэж, хэлэлцээрийн явцтай уялдуулан УИХ, Засгийн газрын түвшинд танилцуулна.
“Эрдэнэс Монгол” ХХК-д хэлэлцээнд ашиглах санхүүгийн тооцоо, хувилбаруудын үр дүнг тооцож танилцуулахыг үүрэг болгожээ. Өнгөрсөн таван сарын хугацаанд Оюу толгой төслийн санхүүгийн тооцоо, ТЭЗҮ, материалд нарийвчлан дүн шинжилгээ хийсэн байна. Үүний үр дүнд алдаатай тооцооллуудыг засварлаж, Монгол Улсын талаас анх удаа Оюу толгой төсөл дээр өөрсдийн санхүүгийн загварчлалыг боловсруулаад байгаа аж.
Цаашид “Орона Майнинг” компанитай байгуулсан хөрөнгө оруулалтын гэрээний хэлэлцээрийн зарчмын дагуу хэлэлцээг зохион байгуулж, санхүүгийн загварт үндэслэн хөрөнгө оруулалтын гэрээний хэлэлцээг эхлүүлэх бэлтгэл ажлыг хангаад байгаа юм байна.
Уг боловсруулсан загварчлал нь олон улсын томоохон хөрөнгө оруулалтын банк, санхүүгийн байгууллагын ашигладаг FAST стандартад нийцсэн бөгөөд загварчлалыг боловсруулагдахдаа Торонтогийн хөрөнгийн бирж дээр бүртгэлтэй “Антре гоулд” компанийн хөрөнгө оруулагчдадаа зориулсан тоо баримтад суурилж, харьцуулсан шинжилгээ хийснээрээ илүү бодитой илүү онцлог болсон гэдгийг онцоллоо.
Ажлын хэсгийн үйл ажиллагааг үр дүнтэй зохион байгуулах үүднээс Монгол-Францын хамтарсан ураны төслийн хөрөнгө оруулалтын гэрээг байгуулсан, хэлэлцээ хийсэн зарчимтай ижил загвараар уг хэлэлцээг зохион байгуулахаар ажлын хэсэг төлөвлөж байгаа бөгөөд тухайлсан асуудлаар хариуцах гэрээ эрх зүйн асуудал хариуцах, эдийн засаг, санхүү, татварын асуудал хариуцах, уул, уурхай байгаль орчны асуудал хариуцах дэд ажлын хэсгүүд байгуулахаар шийдвэрлэн зохион байгуулалтаа хийгээд ажиллаж байгаа хэмээн Г.Дамдинням сайд танилцуулав.
