УИХ дахь МАН-ын бүлгээс мэдээлэл хийлээ. Хуралдаанаар хоёр асуудал хэлэлцжээ. Үүнд:
- 2026 оны Төсвийн тухай хууль, түүнийг дагуулж өргөн мэдүүлсэн хууль тогтоомжийг хэлэлцүүлэгт бэлтгэх, дүгнэлт гаргах үүрэг бүхий ажлын хэсгийн хийж буй тооцоолол, судалгааг сонсож, зарчмын хувьд дэмжив.
- Шатахууны нөөц, импорт, хангалт, түгээлтийн өнөөгийн байдал, үүсээд буй нөхцөл байдалтай уялдуулан авч хэрэгжүүлж буй арга хэмжээ, цаашдын төлвийг хэлэлцжээ.
Аж үйлдвэр, эрдэс баялгийн сайд Г.Дамдинням “АИ92 шатахууны үүсээд буй бэрхшээлтэй нөхцөл байдлыг шийдвэрлэж байгаа. Амралтын өдрөөр шатахуун түгээх станцуудыг зохион байгуулалтад оруулж ажилласан. Шатахуун авчраад түгээхгүй байгаа ААН-үүдийг камераар хянаж, хяналтын багийг явуулж, нээхгүй байгаа асуудлыг яриад шуурхай ажиллаж байгаа.
Гадуур оочер, дараалал тодорхой хэмжээнд буурсан, үр дүн гарч байгаа.
Шатахууны тээврийн автомашин Улаанбаатар хотын гудамжаар зөвхөн шөнийн цагаар явах зохицуулалттай. Үүссэн нөхцөлтэй холбогдуулан өдрийн цагаар явуулж байгаа. Зарим үед цагдаагийн хамгаалалтыг гарган өдрийн цагаар түгээлтэд явуулж байна.
Шатахуун хомстсон шалтгаан ердийн үед Улаанбаатар хотод дунджаар өдөрт 1200 тонн АИ92 автобензин хэрэглэдэг байсан. Одоо бол үдээс өмнө 1200 тонн шатахууныг дуусгачхаж байна. Шөнө шатахуун түгээх станцуудыг цэнэглэчхэж байгаа. Шатахуун түгээх станцууд 06:00 цагт онгойгоод л үдээс хойш дуусаад байна. Ингээд хэрэглээ өссөн учраас өдөр цэнэглэхээс аргагүй байна.
ОХУ-аас ачилтыг хангалттай хэмжээгээр нэмсэн. Гадуур оочер, дараалал тодорхой хэмжээнд буурсан, үр дүн гарч байгаа. Монголын нутаг дэвсгэрт өнөөдрийн байдлаар 54 вагон шатахуун буугаад, түгээлт эхэлсэн. Том оврын автомашинтай түгжрэлтэй замд таарвал аль болох хол байж, хурдан шуурхай явах тал дээр нь туслаарай. Яах аргагүй цаг тулаад байгаа тул ийм эрсдэлтэй түгээлтийг хийж байгаа шүү.
Улаанбаатар хот нийт 282 шатахуун түгээх станцтай. Үүний 232 нь томоохон хэмжээний аж ахуйн нэгжид хамаардаг. Эдгээрийг шатахуунаар хангаж буй. Цаашид нөөцийн саваа нэмэгдүүлэх, хоосон саваа дүүргэх, ингэхдээ шатахууныг олон эх үүсвэрээс авахаар төлөвлөж байна” гэлээ.
