Шатахууны хомсдолыг шийдвэрлэхийн тулд ямар зохицуулалт хийж буй талаараа АҮЭБ-ийн сайд Г.Дамдинням /2025.10.27/ мэдээлэл өгөв.
Тэрбээр, Энгийн үед нэг ШТС өдөрт 10 мянган литр шатахуун авдаг байсан. Хэвийн үед нэг жолооч 20-30 литр шатахуун авахад өдөрт 400-500 машин цэнэглэдэг байсан бол одоо машин болгон банкаа дүүргэж буй тул 200 машин цэнэглээд л АИ-92 бензин тасарч байна.
Хэрэглээ 2-3 дахин өссөн учир ШТС-уудыг өдөрт хоёр удаа буюу өдрийн цагаар дахин цэнэглэхээс аргагүй болж байна. Шатахуунаар цэнэглэх машиныг шөнийн цагаар явахыг зөвшөөрдөг ч хомсдолтой холбоотойгоор өдрийн цагаар, авто замын түгжрэлийн дундуур явуулж эхэлсэн.
Өдрийн 14.00 цагаас хойш хоёр дахь цэнэглэлтийг хийж байна. Түгжрэлтэй замд чиргүүлтэй авто машин аюултай ачаа буюу шатахуун тээвэрлэж яваа тул хэрэв замд тааралдвал жолооч нар аль болох зай барьж, аюулгүй байдлаа хангахын дээр хурдан шуурхай явахад нь туслаарай.
ОХУ-аас АИ-92 бензиний нийлүүлэлтийг сүүлийн өдрүүдэд хангалттай түвшинд хийж байна. Хангамжийг богино хугацаанд тогтворжуулахын тулд төрийн бүх шатны байгууллагуудтай хамтарч ажиллаж байна. Улсын хэмжээнд өнөөдрийн байдлаар 54 вагон цистерн АИ-92 шатахуун буулгаад, түгээж байна. 1 вагон 60 тоннын багтаамжтай.
Шатахуун авах дараалал тодорхой хэмжээнд буурсан.
Өнөөдрийн байдлаар нийслэлд хамгийн их нь 35 машины дараалал үүссэн байна гэсэн мэдээллийг телекамерийн системээс харж бидэнд өгсөн гэлээ.
