Засгийн газрын гишүүн Шадар сайд С.Амарсайханыг өчигдөр үүрэгт ажлаас чөлөөлсөн. Тус албан тушаалд УИХ-ын гишүүн, Төсвийн байнгын хорооны дарга Х.Ганхуягийг томилно гэсэн мэдээлэл цахим орчинд цацагдлаа.
Энэ талаар сэтгүүлчид түүнээс өөрөөс тодруулахад, Намайг Шадар сайдаар томилно гэсэн мэдээлэл надад ирээгүй. Төсвийн байнгын хорооны даргаа хийж, ирэх оны төсөв дээр ажиллаж байна. Цалин, тэтгэврийг яаж нэмэх вэ, эх үүсвэр олдохгүй байна.
-Таныг Шадар сайдаар томилох санал ирвэл хэрхэн хүлээж авах вэ?
-Санал ирээгүй учир хэрхэх талаар хэлж мэдэхгүй байна.
-Цалин нэмэх тухай багш нарын шаардлагыг биелүүлэх боломжтой юу?
-Манай улсын төсөв хязгаартай, 32.9 их наяд төгрөг. Үүний 8.8 их наяд нь хөрөнгө оруулалт, мөн 8.8 их наяд нь цалин, тэтгэвэр. 17 их наяд нь урсгал зардал буюу хүүхдийн мөнгө, төрийн албан хаагчдын цалин. Цаана нь 5-хан их наяд төгрөгөөр аймаг, сумын Засаг дарга, агентлагууд үйл ажиллагаа явуулдаг. Үүнээс хасаж, цалин тэтгэврийг нэмж байгаа.
Бүх хөрөнгө оруулалтаа танаж, цалин болгох ямар ч боломжгүй. Ямар ч байсан амласны дагуу багш нарын цалинг 2026 оны 1-р сарын 1-нээс 20 хувь нэмж, 7-р сараас дахин 10 хувиар нэмэх санхүүжилтийг төсвийн тодотголтой хамт УИХ-д оруулж ир гэсэн үүрэг өгөх гэж байна гэв.
