УИХ-ын чуулганы хуралдаан үргэлжилж байна. Хуралдаанаар дараах асуудлыг хэлэлцэнэ.
-
Монгол Улсын 2026 оны төсвийн тухай хуулийн төслийн хамт өргөн мэдүүлсэн хууль, тогтоолын төслүүд /Засгийн газар 2025.09.01-ний өдөр өргөн мэдүүлсэн, эцсийн хэлэлцүүлэг, асуулт, хариулт 60 минут/-ийг эцэслэн батална.
-
Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл /Засгийн газар 2025.09.01-ний өдөр өргөн мэдүүлсэн, дөрөв дэх хэлэлцүүлэг/
-
Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүд /Засгийн газар 2025.09.01-ний өдөр өргөн мэдүүлсэн, тав дахь хэлэлцүүлэг/
Хэлэлцэж буй асуудалтай холбогдуулан УИХ-ын гишүүн А.Ариунзаяа “Төсөв дагасан хууль, тогтоомжуудыг орж ирсэн хувилбараар нь дэмжихгүй байсан. УИХ дахь ажлын хэсгүүд сайн ажиллажээ. Нэн ялангуяа Үндэсний баялгийн сантай холбоотой дагаж гаргах хууль тогтоомжтой Засгийн газар өөртөө тусгайлсан эрх авч байгаад оффтэйк гэрээ байгуулах гэж байсныг тодорхой хэмжээнд өөрчилжээ.
Үндсэндээ урт хугацааны гэрээ байгуулна, биржийн үнээр борлуулахгүй, Засгийн газар өөрсдөө гэрээг байгуулна гэж оруулж ирсэн санаархал байж боломгүй асуудал. Ажлын хэсэг үүнийг нээлттэй, ил тод, хуулийн дагуу зохион байгуул гэсэн өөрчлөлт оруулж ирж байгааг сайшааж байна.
Хэн яаж төрийн нууцад авсан тухай бүх асуудлыг 2026 оны зургаадугаар сарын 1-ний дотор УИХ -д тайлагнах үүрэг даалгавар өгч байгаа юм байна. Хэрэв биелүүлэхгүй бол яах вэ, үүнийг тодорхой болгомоор байна. Үндсэндээ нэгнийгээ харлуулах, үл мэдэгдэх асуудлуудыг урд өмнө нь Ерөнхийлөгчөөр ажиллаж байсан хүнээр хүртэл дамжуулан олон нийтэд хачирхалтай мэдэгдлүүдийг хийсэн.
Эцэстээ үнэнд гүйцэгдэж нэг талын санаачилгаар цуцлах боломжгүй, энэ бол хоёр улс хооронд байгуулсан хэлэлцээр гэж зарим асуудлыг хааж байна билээ.
НӨАТ-ын буцаан олголттой холбоотой иргэдэд таатай юм шиг мэдээ дуулгасан. Гэвч хэрэгжүүлэх хугацаагаа 10 дугаар сарын 1-нийг хүртэл хойшлууллаа. Батлагдсан төсөв нэлээд хүндрэл авчрах, хэрэгжүүлэхэд хүнд төсөв батлагдсан учраас тун удахгүй төсвийн тодотгол орж ирнэ байх гэдэгт итгэлтэй байна.
Эмч нартай хийсэн хэлэлцээрээ биелүүлэх төсөв батлагдаагүй. Тэгэхээр төсвийн тодотголоо одооноос бэлдэх нь зүйтэй гэдэг санал хэлж байна” гэв.
