Монгол Улсын Их Хурлын хяналт шалгалтын тухай хуулийн дагуу Хянан шалгах түр хороо нь сонсголын тов болон гэрчийн нэрсийг хуулийн хугацаанд багтаан, олон нийтэд мэдээлэх үүрэгтэй байдаг.
Энэ хүрээнд Оюутолгойн Хянан шалгах түр хороо нь сонсголын товыг 12 дугаар сарын 8-12-ны өдрүүдэд зохион байгуулахаар товлож, тус сонсголд 300 гаруй гэрчийг дуудахаар нэрс баталсан талаар зарласан билээ. Тухайлбал, Гэрчүүдийн нэрсэд тухайн үеийн албан тушаалаар Монгол Улсын Ерөнхийлөгч 3, Ерөнхий сайд 7, УИХ-ын гишүүд 39, Засгийн газрын гишүүд 25 болон бусад холбогдох албан тушаалтан, иргэдийн нэрсийг нээлттэй мэдээлж байна.
Эдгээр дуудагдсан гэрчүүд нь Оюутолгой тойрсон олон жилийн эргэлзээтэй асуудлуудад өөрийн биеэр ирж тайлбар хийх, олон нийтийг мэдэх эрхээр хангахад дэмжлэг болох гэрчүүд юм. Иймд эх орныхоо төлөө энэхүү боломжийг ашиглаж нээлттэй сонсголд идэвхитэй оролцож, үнэн зөв мэдээлэл өгөхийг хүсч байна.
